Izet Haxhia fitoi sot të drejtën për t’u rigjykuar lidhur me dosjen “Azem Hajdari”. Gjykata e Tiranës ka pranuar sot kërkesën e Izet Haxhisë për rigjykim ndaj tij. Vendimi është marrë nga gjyqtari Besnik Hoxha, i cili pranoi kërkesën e ish-truprojës së Sali Berishës për t’u rigjykuar.
Izet Haxhia është dënuar në mungesë me 25 vite burg si bashkëpunëtor në vrasjen e Azem Hajdarit mbrëmjen e 12 shtatorit 1997.
Sakaq para trupës gjykuese, ish-truproja i Sali Berishës ka bërë një akuzë të fortë në drejtim të këtij të fundit, kur tha se ish-kryeministri ka paguar 1 milion euro për ta vrarë atë në Turqi. Izet Haxhia flet për një atentat të dështuar ndaj tij.
Berisha pagoi 1 milion euro që të më hiqte qafe në Turqi, por nuk ia doli. Dosja “Azem Hajdari” është treguesi i qartë i futjes së duarve të krimit në drejtësi nga klanet e malësorëve të Tropojës dhe Skraparit. Të denohem, por sëpari të dëgjohem. Dua të pyes Sali Berishën për kalvarin e vrasjeve të nisura më 4 janar 1998… A ka lidhje dhëndri juaj me këtë?
Sakaq Bashkim Nikolla, avokati mbrojtës i Izet Haxhisë, e cilësoi ditë të mirë për drejtësinë vendimin e Gjykatës së Tiranës për rigjykimin e klientit të tij.
E sipas tij, Izet Haxhia është dënuar me prova të sajuara dhe se ai është i pafajshëm
“Para se t’ju përgjigjem pyetjes, me këtë vendim që mori gjykata e shkallës së parë Tiranë, është një ditë shumë e mirë për shqiptarët. Përsa i përket aspektit procedurial, do procedojmë më tej me ankimimin. Do provojmë se s’na takon dënimi 25 vjet por pafajësia.
Ka prova Izet Haxhia që është i pafajshëm. Do sqarojmë pozicionet tona. Dosja, politike e qepur keq. Duam të gjykohemi e të rigjykohemi. Dosja është skandaloze. Vetëm dje kemi patur mundësinë ta prekim fizikisht dosjen prej 700 e ca faqeve. Janë mbi 21 politikanë me në krye të parin e vendin, që janë thirrur për dëshmitarë e s’kanë begenisur.
Kanë patur të gjithë një seli. Sot është ora që drejtësinë ta përfillin të gjithë. Do vijnë të gjithë politikanët. Nëse dje ishin të zënë me punë le t’a bëjnë nesër. Janë dhënë 1 milionë euro për të vrarë Izet Haxhinë. Shkaku madhor ka qenë rreziku për jetën, rrezik permanent për Izet Haxhinë. Më në fund do ketë drejtësi, pa le të përmbyset bota. Kam shumë besim tek drejtësia”.
