Sistemi kryesor i furnizimit me ujë të Athinës është nën presion gjithnjë e më të madh, pasi rezervuari i Mornosit, burimi kryesor i ujit të pijshëm për kryeqytetin, është në nivelet më të ulëta.
Një studim i Observatorit Kombëtar të Athinës tregon se niveli i ujit në liqen ka arritur pikën kritike për herë të dytë brenda dy dekadave.
Studimi thotë se rezervuari i Mornosit funksionon në rreth 60–65% të kapacitetit të tij, duke shënuar një rënie të vazhdueshme që prej vitit 2022, kur kishte arritur pothuajse kapacitetin e plotë.
Vetëm në vitin 2008 ishte regjistruar një sipërfaqe më e vogël në të njëjtin muaj.
Edhe rezervuari ndihmës i Evinosit është ndikuar rëndë. Në maj 2025, sipërfaqja e tij ra në 2.3 km², shumë më poshtë se kapaciteti i plotë.
Të dy rezervuarët janë aktualisht në rreth 60% të kapacitetit të tyre, duke reflektuar kushtet e akumuluara të thatësirës, reshje të ulëta dhe stres të lartë termik.
Ekspertët thonë se studimi paralajmëron një situatë jo të mirë për të ardhmen. Kryeqyteti i Greqisë, me një popullsi mbi 3.6 milionë banorë, ka nevojë gjithnjë e më shumë për ujë, për shkak të turizmit dhe zgjerimit të tij.
Edhe pse të dhënat klimatike për 2025 tregojnë përmirësim të lehtë, ekspertët paralajmërojnë për një dobësim të mundshëm të ujëmbledhësit që ushqen rezervuarët.
Raporti kërkon ndërhyrje emergjente nga qeveria greke për të shmangur përkeqësimin e situatës me ndikimin e ngrohjes globale.
