Presidentja e Maqedonisë së Veriut, Gordana Siljanovska Davkova ka reaguar në lidhje me thirrjet antishqiptare, gjatë një ndeshjeje basketbolli në Kumanovë mes Maqedonisë së Veriut dhe Rumanisë.
Përmes një postimi në rrjetet sociale, Davkova u shpreh se maqedonasit janë të turpëruar nga ajo çka ndodhi dhe se thirrjet tronditën botën sportive.
Sipas saj, sjellje të tilla nuk duhet të tolerohen.
“Turpi ra për të gjithë: mikpritësin, klubin, pjesëmarrësit, qytetin, shtetin, sportin. Një sjellje e tillë nuk duhet të tolerohet në asnjë stadium, në asnjë sport, kurrë dhe askund”, shkroi ndër të tjera Presidentja e Maqedonisë së Veriut.
Ndërkaq, Federata Ndërkombëtare e Basketbollit (FIBA) deklaroi se ka nisur një hetim lidhur me thirrjet antishqiptare që shpërthyen gjatë një ndeshjeje basketbolli mes Maqedonisë së Veriut dhe Rumanisë gjatë fundjavës.
FIBA tha se e dënon pa rezerva dhe me vendosmëri gjuhën e urrejtjes dhe çdo formë diskriminimi apo gjuhe raciste.
Incidenti ka shkaktuar gjithashtu reagime të ashpra në Kosovë dhe Shqipëri.
