Pirateria televizive merr forma të ndryshme, nga më të sofistikuarat.
“Ka dy forma për të piratuar. E para përmes formës digjitale dhe e dyta përmes internetit. Doja të ndalesha pak te platforma e dytë, e cila është më e shpeshtë dhe më e vështirë për t’u luftuar, pasi përmes platformës digjitale duhet një rrjet kabllor.
Evidentimi apo konstatimi nëse po piratohemi ose jo është më e thjesht për t’u konstatuar, e si rrjedhojë edhe parandalimi është më i thjeshtë. Ndërsa në rastin e dytë, kur flasim për piraterinë në internet, është një fenomen që nuk gjendet vetëm në Republikën e Shqipërisë, por edhe në vende të tjera”, tregon Besmir Alushi, jurist i “Digitalb”-it.
“Shërbimi i piratuar është në përgjithësi multipleks. Ai nuk piraton vetëm Digitalbin, piraton Tringun, piraton Al Jazeeran, piraton çfarë të gjejë, edhe Sky-in. Bën një paketë me shumë përbërës, me shumë shpërndarës të mundshëm sinjalesh, çka e bën më të kënaqshme në fund fare për abonuesin familjar shqiptar. Gjithshtu ai ul çmimet.
Nuk e shet kurrë me çmimin publik që ka shpërndarësi tipik shqiptar. E gjithashtu ai merr paketë vjetore, sepse e ka të vështirë të mbledhë lekun. Nuk ka rrjet shitjeje. Pra, ai merr të gjithën në një herë. Pra, ul mjaftueshëm që të bëhet interesant çmimi, për ta marrë në një herë”, tha Endri Meksi, ekspert IT-je.
