Aksidenti i rëndë ka tronditur Portugalinë, pasi “Gloria” nuk ishte thjesht një mjet transporti, por një ikonë e Lisbonës…
Bilanci i aksidentit tragjik në Lisbonë është rënduar ndjeshëm: 15 persona kanë humbur jetën dhe mbi 20 të tjerë janë plagosur, prej të cilëve pesë ndodhen në gjendje kritike, sipas burimeve të policisë të cituara nga Diário de Notícias.
Ngjarja ndodhi mbrëmjen e së mërkurës, rreth orës 18:00, kur funikulari i famshëm “Elevador da Glória” doli nga shinat dhe u përplas me një ndërtesë në Rua da Glória, pranë bulevardit Avenida da Liberdade.
Tragjedi në Lisbonë/ Tramvaji historik del nga shinat dhe
Pamjet dhe fotografitë nga vendngjarja tregojnë mjetin e verdhë, simbol të Lisbonës dhe një nga atraksionet kryesore turistike të saj, tërësisht të shkatërruar. Sipas CNN Portugalia, shumë pasagjerë u detyruan të hidhen nga dritaret për të shpëtuar në momentet e para pas aksidentit, ndërsa disa të tjerë mbetën të bllokuar mes hekurave të shtrembëruar.
Një simbol historik i Lisbonës në rrënoja
Funikulari “Gloria”, i cili lidh Praça dos Restauradores me lagjen historike Bairro Alto, ishte mjeti më i përdorur nga turistët për të përshkuar shpatin e pjerrët të qendrës së qytetit. Mjeti ka kapacitet prej 42 personash, të ulur dhe në këmbë.
Ky funikular u inaugurua më 24 tetor 1885, ndërsa në vitin 2002 u shpall monument kombëtar nga shteti portugez. Ai përbëhet nga dy vagona të lidhur me një kabllo nëntokësore, që lëvizin në mënyrë të alternuar dhe të sinkronizuar përgjatë dy shinat paralele.
Tragjedi në Lisbonë/ Tramvaji historik del nga shinat dhe
Por pikërisht njëri prej këtyre kabllove, sipas të dhënave paraprake, ka ceduar gjatë udhëtimit, duke bërë që mjeti të humbasë kontrollin dhe të përplaset me dhunë mbi një ndërtesë të afërt.
Reagimi i institucioneve dhe shpëtim i vështirë
Në vendngjarje u dërguan 8 mjete zjarrfikëse dhe 34 efektivë të emergjencës, që punuan për orë të tëra për të nxjerrë të mbijetuarit nga rrënojat.
Presidenti i Portugalisë, Marcelo Rebelo de Sousa, reagoi menjëherë me një mesazh zyrtar në faqen e Presidencës: “Shpreh ngushëllimet e mia më të thella për viktimat dhe familjet e tyre, si dhe solidaritet të plotë për të plagosurit e shumtë, veçanërisht ata në gjendje të rëndë.”
Tragjedi në Lisbonë/ Tramvaji historik del nga shinat dhe
Shërbimet e emergjencës po vijojnë të kontrollojnë strukturën për të shmangur rrezikun e shembjeve të tjera, ndërsa hetimet e para kanë nisur për të përcaktuar përgjegjësitë në mirëmbajtjen e linjës.
Nga krenari kombëtare në tragjedi
Aksidenti i rëndë ka tronditur Portugalinë, pasi “Gloria” nuk ishte thjesht një mjet transporti, por një ikonë e Lisbonës, e fotografuar nga mijëra turistë çdo ditë dhe e lidhur pazgjidhshmërisht me identitetin urban të qytetit.
Nga një simbol i krenarisë kombëtare, sot ai është shndërruar në shenjën e një tragjedie që ka marrë jetë të pafajshme dhe ka hapur plagë të thella në një nga qendrat më të dashura turistike të Evropës.
