Rikthimi i species së ujkut në Evropë është një “rrezik real” për kafshët dhe jetën e njerëzve, paralajmëroi të hënën Komisioni Evropian ndërsa njoftoi planet për të rishikuar statusin e mbrojtjes së species.
Ekzekutivi do të hyjë në një fazë të re në procesin e tij të vendosjes nëse do të revokojë statusin e ruajtjes së ujqërve duke mbledhur të dhëna nga komunitetet dhe shkencëtarët, pas thirrjeve në rritje nga fermerët evropianë.
“Ne duhet të kemi informacion dhe të dhëna për statusin e ujkut në mënyrë që të jemi në gjendje të ndërmarrim veprime të mëtejshme,” tha një zëdhënës i Komisionit Evropian.
Ujqërit aktualisht mbrohen rreptësisht sipas Direktivës së Habitateve, të miratuar në 1992, e cila ndalon kapjen ose vrasjen e qëllimshme të tyre në natyrë.
Megjithatë tufat e ujqërve janë kthyer së fundmi në rajonet e BE-së pas një mungese prej dekadash, duke sulmuar bagëtitë dhe duke shkaktuar probleme për fermerët evropianë.
Presidentja e Komisionit Evropian Ursula von der Leyen u prek personalisht në shtator të vitit të kaluar, kur kali i saj u vra nga një ujk në Gjermaninë verilindore.
“Përqendrimi i tufave të ujqërve në disa rajone evropiane është bërë një rrezik real për bagëtinë dhe potencialisht edhe për njerëzit,” tha von der Leyen në një deklaratë të hënën.
Von der Leyen u kërkoi autoriteteve lokale dhe kombëtare “të ndërmarrin veprime aty ku është e nevojshme”.
