Në mbledhjen e Këshillit Kombëtar të Territorit të datës 2 korrik 2024, përpos të tjerave, një leje për të ndërtuar një kullë në Tiranë e ka marrë edhe kompania IBN shpk.
“Leje Ndërtimi për objektin: “Strukturë me funksion hotelerie, shërbimesh dhe zyra prej 12 kate + atik mbi tokë dhe 7 kate nëntokë”, me vendndodhje në Rrugën “Vaso Pasha”, Bashkia Tiranë, me subjekt zhvillues shoqërinë “IBN” sh.p.k.”, thuhet në njoftim.
E thrmeluar në vitin 2011, kompania e ndërtimit IBN ka si administratorë Silva Hasaj dhe Asim Spahiu. Kapitati i kompanisë është 48 milionë lekë.
Kompania është blerë në vitin 2012 nga Bujar Hasaj për 100 lekë, ku më pas ka humbur gjurmët.
Në tetor të vitit 2021, Bujar Hasaj ia shet kompaninë BNI për 100 mijë lekë kompanisë B-2, me nipt M01801014N, me objekt mbështetja e shoqërive të kontrolluara nëpërmjet ndihmës, menaxhimit, zhvillimit të teknikave dhe teknologjive të ndërtimit.
Themeluesi, aksioneri dhe administratori i kompanisë B-2, që kontrollon kompaninë BNI që ka marrë kullën, është pikërisht Bujar Hasaj. Kompania ka një kapital 1 milionë lekë.
Hasa ka mbajtur detyrën e Prefektit të Fierit nga periudha nga viti 2009 deri në vitin 2012,
si përfaqësues i partisë së Ilir Metës.
Në vitin 2018, Hasaj u arrestuar për mashtrim me pasoja të rënda dhe falsifikim dokumentash.
“Seksioni për Krimin Ekonomik dhe Financiar në bashkëpunim me Prokurorinë e Rrethit Gjyqësor Tiranë, pas një pune hetimore 8 mujore, ka bërë të mundur finalizimin me sukses të operacionit “Kanadezi”. Në kuadër të këtij operacioni u bë arrestimi në flagrancë i shtetasit: Bujar Hasa, 57 vjeç, lindur në Fier dhe banues në Tiranë.
Gjithashtu në lidhje me këtë procedim, është bërë shpallja në kërkim e shtetasit P.P. Arrestimi i të sipërpërmendurit u bë pasi ky shtetas në bashkëpunim me shtetasin P.P., kanë mashtruar më anë të falsifikimit të dokumentave, shtetasin Kanadez B.H., duke i marrë një shumë prej 260 000 (dyqind e gjashtëdhjetë mijë) dollarësh dhe shtetasin shqiptar D.M., duke i marrë një shumë prej 50 000 (pesëdhjetë mijë) Eurosh“, thuhej në njoftim.
Kapitali i kompanive të Bujar Hasës është 48 milionë lekë. Nuk dihet burimi i parave për të paguar taksën që shkon disa milionë euro dhe për të nisur investimin.
