Britania është i pari vend që ka aprovuar vaksinën e Pfizer, ku dozat e para nga 40 milionë si porosi e parë do të vihen në përdorim duke nisur nga java tjetër.
Ministri i Shëndetësisë Matt Hancock, thotë se viti 2020 ishte i tmerrshëm ndërsa 2021-shi me vaksinimin do të jetë më i mirë.
‘Do të marrë pak kohë për tu shtrirë vaksinimi gjerësisht, duhet doza e dytë pas 21 ditësh, por ne do të punojmë me shpejtësi.’-tha ai.
Ai thotë se me lajmin e mirë sot për Britaninë, me gjasa vera do të jetë periudha ku të gjithë do e shijojnë:
‘Por unë kam besim tani, me lajmet e sotme, që nga pranvera, nga Pashkët e tutje, gjërat do të jenë më mirë. Dhe ne do të kemi një verë vitin e ardhshëm që të gjithë mund ta shijojnë’.
Ministri bëri thirrje që pavarësisht vaksinës së siguruar, duhet të vijohet me respektimin e masave.
Por si do të vaksinohen njerëzit dhe si do shpërndahet ajo?
Ministri Hancock tha se do të ketë tre mënyra:
Nga spitalet: Ministri tha se shumica e spitaleve janë në gjendje të ruajnë vaksinën në temperature minus 70 gradë.
Qendrat e vaksinimit: Qendrat e mëdha, do të ngrihen në të gjithë vendin me pajisjet dhe aparaturat e nevojshme të ruajtjes.
Në komunitet: Mjekët e përgjithshëm dhe farmacistët dhe të tjerët do të ndihmojnë për të vaksinuar njerëzit, edhe pse për këtë ministri thotë se do jetë pak më e vështirë për shkak të kushteve që kërkon vaksina.
Përveç vaksinës Pfizer, Britania ka porositur 100 milionë doza nga vaksina AstraZeneca, për të cilat ministri tha se janë më të përshtatshme për shpërndarjen në komunitet pasi nuk ka nevojë të ruhen në temperature kaq të ulëta sa kërkohen tek vaksina Pfizer.
Gjithashtu, Britania po pret miratimin edhe të vaksinës nga Oxfordi. Për vaksinën Moderna, ministri britanik tha se është ende disi larg pasi pritet të prodhohet dhe të shpërndahet në muajin prill.
Ekspertët britanikë kanë thënë se të parët që do vaksinohen janë grupet më vulnerabël, të moshuarit, mjekët dhe infermierët, dhe ata me sëmundje kronike.
