Komisioneri për Fqinjësinë dhe Zgjerim Oliver Varhelyi është shprehur se shumë shpejt do të ketë një kampus evropian në Tiranë.
Kjo sipas tij është një sinjal i qartë për të ardhmen e Shqipërisë e cila përket në BE.“Jam i lumtur që gjetëm financime për Kampusin evropian në Tiranë, Ky është një sinjal i qartë, se anëtarësimi është afër. Jam krenar të deklaroj se do të nisim procesin e pranimeve qysh në shtator të këtij viti.
Ne kemi nevojë për kolegjin dhe do të ofrojmë financimin për të. Në gjysmën e dytë të këtij viti do të kemi zhvillime të mëdha për të ardhmen e Shqipërisë në BE”, tha Oliver Varhelyi. Sakaq, Varhelyi u pyet edhe për anëtarësimin e Shqipërisë në BE, teksa theksoi se ky proces matet me pune dhe jo me afate.
“Është një pyetje që më bëhet sa herë vij këtu. Kemi çdo gjë në vendin e duhur. Kemi bisedimet e anëtarësimin, gjithçka varet nga sa shpejt përmbushen kushtet për anëtarësimet nga Shqipëria. Nuk punojmë me afate se nuk arrihet puna në terren.
Ky është një çamçakëz për debate publike”, deklaroi ai. Më tej komisioneri për Zgjerimin, Oliver Varhelyi theksoi se duan që Ballkani Perëndimor të jetë sa më shpejt në BE, ndërsa vlerësoi ecurinë e Shqipërisë në realizimin e reformave.
“Ramë dakord se vitin e kaluar nuk u humb kohë, reformat ecën me ritëm. KE është këtu për të kërkuar më shumë, kemi kërkuar përshpejtim të reformave. Ramë dakord se nëse gjithçka shkon mirë, ky vit do jetë edhe më i suksesshëm, të dyja palët fitojnë nga ky progres”, nënvizoi Varhelyi.
