Një zbulim arkeologjik ka ndodhur së fundmi në zonën e Bulqizës, konkretisht në fshatin Strikçan.
Bëhet fjalë për një gërmim të rrallë që ka sjellë në dritë varrin e parë monumental të periudhës romake të zbuluar ndonjëherë në Shqipëri.
Monumenti, i ndërtuar në formën e një mausoleumi, ka përmasa mbresëlënëse – rreth 9 metra me 6 metra, dhe përfshin një dhomë funerare me lartësi 2.4 metra.
Ajo që e bën edhe më të veçantë këtë zbulim është një mbishkrim bilingual romak, i cili i kushtohet personit të varrosur, një individ me emrin Gellianos, si dhe perëndisë Jupiter.
Sipas specialistëve, ky është mbishkrimi i parë i këtij lloji i zbuluar ndonjëherë në zonën e Dibrës, dhe një prej të paktëve të këtij karakteri në gjithë territorin shqiptar.
Zbulimi përmban elementë të rrallë arkitektonikë dhe epigrafikë, duke sjellë një pasuri të re në historinë arkeologjike të vendit.
Arkeolog Erikson Nikolli, i ftuar në studion e lajmeve në “Ora News” zbuloi detaje nga kjo arritje studiuesve shqiptarë.
“Ky varr monumental është një gjë e re për ne dhe për herë të parë ne arritëm të zbulonim në Shqipëri një monument të tillë dhe që ka pasuruar pa masë të dhënat historike të ndodhura në territorin tonë.
Po ashtu ndodh për herë të parë që në zonën e Dibrës zbulohen vepra të tilla dhe na ndihmon të kuptojmë edhe mënyrën se si shtresa e lartë e kohës jetonte në territorin tonë.
Dhe është e qartë që Perandoria romake emëronte një njeri të fuqishëm në mbrojtjen e territorit të saj në kufijtë e shtrirjes së saj. Dhe për ne ky zbulim është unikal për nga rëndësia e tij”, u shpreh ndër të tjera Erikson Nikolli.
