Në një kohë kur kryeministri Edi Rama është në mëdyshje për rikandidimin e kryebashkiakëve socialistë, Erion Veliaj e ka të sigurt rikandidimin. Nga asambleja e FRESSH e mbajtur dje, Veliaj tha se pret një fitore spektakolare në kryeqytet në zgjedhjet lokale të 30 qershorit të 2019. Ai u bëri thirrjeve qytetarëve që të votojnë Partinë Socialiste.
Ndërsa duke komentuar protestën e banorëve të Unazës së Re, Veliaj tha se PS mund të fitojë pa asnjë kapsollë duke punuar dhe respektuar kundërshtarin. “Ne mund të fitojmë pa asnjë kapsollë, duke punuar, respektuar kundërshtarin, duke i bashkuar me alternativa dhe jo duke i përçarë. Mezi pres që me ekipin e ri të kemi një fitore spektakolare në Tiranë. Kësaj here nuk na duhet vetëm fitorja, na duhet një fitore absolute, kemi nevojë që të mos e kthejmë Bashkinë e Tiranës në ‘minitepsi’.
Kori i njerëzve që duan që vendi të eci përpara, që të zhvillohet, është i madh. Partia Socialiste mund të fitojë vetëm duke qenë një parti që punon, duke respektuar kundërshtarin, duke u sjellë me etikë, duke i thënë komunitetit alternativa, duke i bashkuar dhe jo duke i përçarë njerëzit”, tha Erion Veliaj.
Por deklaratat e tij duken si një mesazh për Ramën. Veliaj po këmbëngul për rikandidimin dhe po e bën këtë si fakt të kryer duke kërkuar fitore absolute për PS, edhe pse kryeministri nuk ka dhënë deri tani asnjë sinjal se cili do të jetë fati i tij. Madje edhe dy ditë më parë në një intervistë televizive, kur u pyet për këtë çështje, Rama preferoi të heshte, duke mos dhënë asnjë detaj se çfarë do të bëhet me Veliajn. / Mimoza IBRA
