Komisioni i Pavarur i Kualifikimit sot do të japë vendimin për prokuroren e Apelit në Tiranë, Fatjona Memçaj. Pavarësisht raportit të dorëzuar nga ILDKPI, KPK u shpreh seancën e kaluar se ka kryer një hetim të thelluar administrativ për pasurinë e prokurores, kontaktet e mundshme me krimin dhe aftësitë profesionale.
Prokurorja ka deklaruar një apartament 96 m2 më vlerë 27 mijë dollarë, automjet dhe motor Vespa dhe llogaritë bankare. Sipas drejtorisë së informacionit të klasifikuar, prokurorja nuk ka asnjë problem.
Për sa i përket analizës profesionale, ndaj saj ka dy denoncime nga qytetarët, ndërsa sipas KPK-së prokurorja ka qenë bashkëpunuese gjatë procesit të vettingut. Edhe vetë prokurorja Fatjona Memçaj është shprehur seancën e kaluar se “Rezultatet e verifikimit të vettingut për mua janë korrekte. Nuk kam kontestim. Kërkoj të rikonfirmohem në detyrë”.
Deri tani Komisioni ka përjashtuar gjyqtarin e Kushtetueses Fatos Lulo, gjyqtari i Gjykatës së Apelit në Durrës, Besim Trezhnjeva dhe prokuroren e Apelit Shkodër Besa Nikëhasani, ndërsa ende unk është dhënë vendimi për Altina Xhoxhaj. E vetmja që ka kaluar Vettingun deri tani është gjyqtarja e Kushtetueses Vitore Tushaj.
