Shpallja e humbjes së dy binjakeve, të cilat babai dhe nëna pretendojnë se i kanë parë në televizor, pasi kanë zbritur nga skafi që i ka marrë nga zona e Atikisë, është një ndër historitë më tragjike që i ka prekur të gjithë, pasi një tjetër çift ka deklaruar se ato vajza që shfaqen në televizion nga xhirimet e “Alpha”, janë vajzat e tyre dhe janë me ta.
Babai i cili thotë se binjaket e tij, të cilat rezultojnë të humbura, janë pikërisht ato që shfaqen në video, në një intervistë të dhënë pak minuta më parë është shprehur se ai dhe gruaja e tij janë të bindur se vajzat janë të tyret, edhe pse familja tjetër ka deklaruar se ata janë ngatërruar dhe se dy vogëlushet janë fëmijët e tyre.
“Nuk e di nëse është nga gjendja jonë e ngarkuar, nga shoku që kemi pësuar, por nuk besoj se jemi aq keq sa të ngatërrojmë dhe të mos njohim vajzat tona. Ato që shihen në ato pamje janë vajzat e mia. Ndoshta familja tjetër, sepse në video shihen një burrë dhe një grua, bashkë me vajzat e tyre, aty afër kanë pasur edhe të mijat, sepse aty duket që janë më shumë se tre vajza”, është shprehur ai mes dhimbjes dhe agonisë.
“Ne kemi shkuar në çdo spital për të parë nëse mes të lënduarve janë dhe vajzat e mia, por nuk i kemi gjetur. Gjithashtu kemi dhënë edhe kampion të ADN-së për të parë nëse ndonjë nga viktimat janë fëmijët tanë, por për fat të mirë, nuk ka rezultuar asnjë. Ne shpresojmë dhe jemi të bindur se ato vajza janë binjaket tonë, por ndoshta teksa kanë parë gjyshërit të digjen, prindërit e mi, janë shokuar dhe nuk munden që të flasin dhe të reagojnë për të na kërkuar”, shprehet ai.
Ka shokuar me historinë e tij babai grek, i cili është i shqetësuar dhe në ankth po kërkon vajzat e tij binjake të moshës dyvjeçare, të cilat, kur shpërtheu zjarri, ishin me gjyshen dhe gjyshin e tyre.
Ai është Yiannis Filipopoulos, i cili pasi kërkoi në spitale, stacione policore dhe zjarrfikëse, ka drejtuar një apel prekës përmes ekranit të televizioneve greke për këdo që di diçka për vajzat e tij, që ta informojnë.
Ai tha se në një prej televizioneve kishte parë që vajzat e tij të mitura që u shpëtuan nga një anije në Rafinë dhe më pas u transportuan në tokë.
Megjithatë, deri tani ai nuk ka arritur të kontaktojë me to.
