Etna, vullkani më aktiv në Europë, ka shpërthyer në orët e para të mëngjesit të sotëm (2 qershor), duke ofruar një spektakël dramatik të natyrës në Sicili – ndërsa turistët e shumtë që ndodheshin pranë shpërthimit janë panikosur dhe kanë vrapuar për t’u larguar.
Sipas Institutit Kombëtar të Gjeofizikës dhe Vullkanologjisë (INGV) në Itali, shpërthimi nisi gjatë natës dhe mori përmasa më të mëdha në mëngjes, duke u kthyer në një ngjarje stromboliane – një lloj shpërthimi tipik për Etën, me shpërthime të fuqishme të lavës dhe hirit.
Pamjet që po qarkullojnë në rrjete sociale tregojnë turistë që vrapojnë të tmerruar poshtë shpatit të malit, ndërsa re të mëdha hiri mbulojnë qiellin mbi Sicili.
“Shpërthimet janë pothuajse të pandërprera dhe po bëhen gjithnjë e më të fuqishme,” njoftoi INGV rreth orës 11:55 paradite. Imazhet termike treguan rrjedhje të materialit vullkanik poshtë shpateve të malit, megjithëse lavat ende nuk kanë arritur në Luginën e Luanit, një zonë që rrethon kraterin aktiv.
Qendra Evropiane për Hirin Vullkanik në Tuluzë lëshoi në fillim një “kod të kuq” për aviacionin, alarmi më i lartë për fluturimet, por më pas e uli në portokalli, duke sqaruar se reja e hirit përbëhej kryesisht nga avuj uji dhe dioksid squfuri, dhe po zhvendosej drejt jugperëndimit.
Deri tani nuk raportohet për të lënduar apo dëme materiale, por në zonën Piano Vetore janë raportuar reshje të lehta hiri.
Etna ndodhet pranë qytetit të Katanias, dhe për shkak të afërsisë me zonat e populluara dhe aeroportet, monitorohet rregullisht për aktivitet vullkanik dhe sizmik. Autoritetet italiane u kanë bërë thirrje qytetarëve dhe turistëve që të tregojnë kujdes dhe të ndjekin udhëzimet zyrtare.
