Zjarri rrezikon banesat në Lukovë e në fshatin Shalës. Mbrëmjen e sotme u bë evakuimi i banorëve në Kalasë e Sasaj. Në Kalasë u ndërhy me helikopter, por situata vijon të mbetet kritike. Në Borsh situata u stabilizua, ndërsa orët e para të mëngjesit u evakuuan 40 banorë e turistë. 12 persona të arrestuar ose të vënë në hetim për zjarrvënie në 72 orët e fundit.
Vijon zjarri në Kalasë, flakët përhapen drejt Shën Vasilit dhe Vanës
Zjarr pranë tunelit të Skërficës, rrezikon zonën e mbrojtur të Piksit në Gjirokastër
Flakët afër banesave në Sasaj, evakuohen banorët
Borshi i shkrumbuar, avioni Canadair nga Italia në operacion për shuarjen e flakëve
Situata nga zjarret në vend mbetet kritike. Dukej sikur kishte një përmirësim të situatës, por në orët e pasdites dhe të mbrëmjes situata u përkeqësua në disa fshatra në jug të vendit. Banorët në fshatin Kaninë dhe në Sasaj janë evakuuar nga banesat.
Një helikopter punoi deri rreth orës 21:00 për shuarjen e flakëve në Kaninë. Zjarrfikësit janë ende në terren dhe po punojnë për shuarjen e flakëve pasi rrezikohet të digjen edhe banesa, ndërsa situata në terren u inspektua edhe nga ministri i Mbrojtjes, Pirro Vengu. Zjarri vijon përhpajen drejt Shën Vasilit dhe Vanës, ndërsa Ministria e Mbrojtjes deklaron se në aksion janë angazhuar zjarrfikësit e Delvinës dhe Sarandës, efektivët e Forcave të Armatosura, zjarrfikës nga Baza e Mbështetjes së Emergjencave Civile.
Ndërkohë, situata paraqitet kritike edhe në Lukovë e fshatin Shalës të Konispolit. Zjarrfikësit e ambulanca ndodhen në Lukovë, ndërsa për shuarjen e flakëve po punohet edhe në Shalës.
Një vatër zjarri ka edhe në zonën Bashaj, Bashkia Delvinë, rreth 1 km në jug të tunelit të Skërficës, por qarkullimi vijon normalisht. Flakët rrezikojnë të hyjnë në territorin e Bashkisë Gjirokastër, në zonën e mbrojtur të Piksit.
Ndërkohë, situata në Borsh u stabilizua mëngjesin e sotëm. Borshi u zgjua në një situatë të rrezikshme si pasojë e flakëve masive që kishin “pushtuar” vendin. Flakët në fshatin bregdetar iu afruan plazhit, ndërsa pushuesit filluan të largohen nga hotelet. 40 banorë dhe turistë që rrezikoheshin nga zjarri masiv u evakuuan. Rruga kryesore Himarë-Sarandë për disa orë ishte e pakalueshme për shkak të rrezikut nga flakët.
Ministria e Mbrojtjes njoftoi se pas situatës tejet të vështirë në Borsh situata u vu nën kontroll, ndërsa në operacion u përfshinë dy helikopterë të ushtrisë dhe një avion zjarrfikës Canadair i dërguar nga Italia në kuadër të ndihmës nga BE.
Në Bulqizë, në zonën e Qafë Buallit, flakët janë përhapur drejt Qytetit të Vjetër, duke detyruar evakuimin e gjashtë banesave. Situata mbetet problematike në Parkun Kombëtar të Prespës dhe në Lurë, ku flakët po përhapen në zona të mbrojtura.
Gjatë 72 orëve të fundit janë identifikuar, kapur, arrestuar apo proceduar penalisht 12 persona të dyshuar si shkaktarë të zjarreve në qarqe të ndryshme, përfshirë Tiranën, Vlorën, Durrësin, Gjirokastrën dhe Fierin.
Pasi zjarri në fshatin Kalasë në Delvinë vijon, policia ka nisur evakuimin e banorëve.
Në pamjet e siguruara nga Report Tv shihen forcat e policisë teksa janë duke evakuuar të moshuar edhe fëmijë. Ata kanë bërë rezistencë ndaj policisë, pasi duan që të jenë afër banesave të tyre.
Aktualisht në këtë fshat janë 2 zjarrfikëse të Delvinës.
