25 vjet burg kërkon prokuroria e Elbasanit për Arbër Paplekajn. Ai akuzohet për vrasjen e aktivistit të Partisë Socialiste Pjerin Xhuvani pak ditë para zgjedhjeve të 25 prillit 2021.
Pas një procesi të gjatë gjyqësor dhe pasi dëgjoi dëshmitë e 52 personave, organi i akuzës në Elbasan dha pretencën për Paplekajn e po ashtu edhe për personat e tjerë që janë nën hetim.
Për dy ish-nëndrejtorët e policisë së këtij qyteti, Albert Nushi dhe Nikollaq Palla, prokuroria kërkoi 2 vjet dënim shërbim prove ndërsa për 6 efektivët e tjerë 8 muaj shërbim prove. Këta akuzohen për shpërdorim detyre ditën që ndodhi vrasja, kishin dijeni për persona të armatosur, ndërsa akuzohen se kanë fshehur prova në vendin e ngjarjes.
Ngjarja e rëndë ndodhi në 21 prill të vitit 2021 në qytetin e Elbasanit. Struktura për mbrojtjen e votës e ngritur nga PD pretendonte se përfaqësues të Partisë Socialiste po blinin vota. Dy grupet u përplasën me njëra-tjetrën dhe Arbër Paplekaj qëlloi me kallashnikov duke lënë të vdekur Pjerin Xhuvanin dhe u plagosën 4 persona. Vetë Paplekaj pas ngjarjes deklaroi se qëlloi për vetëmbrojtje.
