Një tjetër dosje e zezë që i përket të kaluarës së Barcelonës mund të dalë në dritë këto ditë. Sikur të mos mjaftonte çështja Negreira, tani pritet që pjesë e hetimeve të bëhen edhe disa dokumente sekrete të zbuluara në mënyrë të çuditshme dhe që mund të vërtetojnë për pagesa në të zezë të kryera nga katalanasit ndër vite.
Sipas “El Pais”, policia spanjolle ka gjetur disa fletë të shkruara me një stilolaps të kaltër në një kasafortë të fshehtë në banjën e Hosep Kontreras, ish-drejtuesi i Barcelonës në vitet e presidencës së Nunjez, Gaspart dhe Bartomeut, i cili është ndarë nga jeta në dhjetor.
Personi në fjalë mbante dokumente të fshehura me pagesa që i janë bërë ndër vite personave të caktuar apo me urdhër të drejtuesve të Barcelonës. Shpjegohet se në këto dokumente janë emra që identifikohen lehtë si “Josep Maria” (Bartomeu) apo “Z. Rosell”.
Shtëpia e tij u kontrollua nga policia pasi ai ishte nën hetim për një çështje tjetër, asaj mbi dyshimet për vjedhje fondesh nga ish-presidenti i Federatës Spanjolle, Angel Maria Vijar. Por ajo që shkruhej mbi zarfin ku gjendeshin dokumentet, paralajmëron se bëhet fjalë për diçka shumë të rëndë. “Klauzola” të hapet vetëm nëse certifikohet fatkeqësia më e madhe për ne. Do të bënim shumë mirë pa të”, shkruhet mbi zarf. Në faqen e parë ka një listë me prona dhe emra personash dhe kompanish të cilave u përkasin.
La Liga e ka bashkuar këtë zarf me dosjen e hapur për çështjen Negreira teksa ka pranuar se “emrat mund të përputhen me ish-drejtues të Barcelonës dhe Federatës Spanjolle”. Problemi kryesor për Barcelonën është se në mediat spanjolle është zbuluar në javët e kaluara se pikërisht Kontreras ishte ndërmjetësi mes klubit katalanas dhe djalit të ish-zëvendëspresidentit të arbitrave, Negreira, i cili paguhej nga katalanasit.
