Një familje në Hawai u trondit kur një gur masiv përfundoi brenda shtëpisë së tyre. Caroline Sasaki po shkonte drejt dhomës së ndenjes në Honolulu mbrëmjen e së dielës, kur guri masiv u përplas në shtëpinë e saj.
Ishte shkëputur nga një kodër aty pranë dhe përpara se të përfundonte brenda shtëpisë, shembi murin rrethues të saj dhe dëmtoi edhe makinën e parkuar në oborr.
Sasaki ishte tepër me fat, siç shihet edhe në video. Vetëm pak hapa më tutje, guri do ta kishte marrë para. Duke folur për mediat, gruaja tha se familja kishte fare pak kohë që ishte transferuar në këtë banesë.
“Dëgjova një zhurmë të fortë, e mesa duket guri kaloi fiks përpara meje, gjë që nuk e dija. Nuk e pashë, e vetmja gjë që dëgjova ishte një ‘boom’ dhe më pas dikë që më pyeti nëse isha mirë”, rrëfeu ajo.
Në momentin e ngjarjes në shtëpi ishin të gjithë anëtarët e familjes. Fatmirësisht, njësoj si Sasaki, askush nuk mori dëmtime.
“Jam praktikisht nën shok. Refuzoj që ta shoh videon, kështu që nuk jam e sigurt sa afër ka qenë, por të gjithë po më thonë se jam me fat. Zoti është me mua”, tha Sasaki për ABC7.
