Viti 2018 ka qënë viti i ndryshimeve të mëdha për rrjetin e zyrave të punës në të gjithë vendin.
Kështu ka deklaruar nga studio e ERTV, Zëvendës Ministrja e Financave, Dajna Sorensen, ndërsa ka folur për performancën e Shërbimit Kombëtar të Punësimit, që sipas saj, ka tejkaluar objektivat e vendosura për rritjen e punësimit të shqiptarëve.
“Për vitin 2018 zyrat e punës patën disa objektiva shumë ambicioze të cilat duhet t’i arrinin. Presupozohej të punësoheshin rreth 25 mijë persona, por faktikisht jo vetëm që u arrit objektivi, por edhe u tejkalua me 148 %.
Në vitin 2018, janë 34 669 shqiptarë që kanë marrë ndërmjetësimin për punësim nga zyrat e punës”, tha Sorensen.
Sipas Zëvendës Ministres, kjo rritje është në të njejtën kohë edhe një reflektim i performancës shumë të mirë të ekonomisë shqiptare sepse në fund të ditës, vendet e punës nuk i krijon zyra e punës, por bizneset që sot ofrojnë më shumë vende pune.
Sorensen u ndal edhe te shifrat e kategorive që janë trajtuar me prioritet për punësim nga zyrat e punës, si të rinjtë apo familjet e dala nga ndihma ekonomike.
“Nga këto 34 669 persona që u punësuan përmes zyrave të punës, rreth 13 400 kanë qënë të rinj, por një prioritet të veçantë kanë patur ata që ishin në skemën e ndihmës ekonomike dhe mbi 4000 familje kanë përfituar në 2018-n nga skemat e shërbimit kombëtar të punësimit.
Përveç këtyre, fokus ka pasur edhe te gratë e vajzat, kryefamiljare, komuniteti rom dhe egjiptian, që janë edhe shtresat më vulnerabël në tregun e punës”, shtoi Sorensen.
Sot Zyrat e Punës ofrojnë paralelisht 8 Programe të nxitjes së punësimit, ashtu si edhe programe aftësimi profesional që synojnë të pajisin punëkërkuesit me një set aftësish, për të cilat biznese shprehin nevojën.
