Zv. Ndihmës sekretari i Shtetit në SHBA, Jorgan K. Andrews i shoqëruar nga e ngarkuara me punë e Amerikës në Shqipëri, Leyla Moses- Ones dhe dy ekspertë të misionit të OPDAT, Julie Craven dhe Michelle Lakomy zhvilluan një takim me kryetarin e KLP-së, Gent Ibrahimi në prokurorinë e Përgjithshme me fokus Reformën në Drejtësi.
Gent Ibrahimi i ka njohur zyrtarët amerikanë me ngritjen e institucioneve të reja të drejtësisë në Shqipëri, por edhe formulën e re si mund të vendoset më shpejt në funskion SPAK-u. Në mungesë të 10 prokurorëve, Ibrahimi tha se po shikohet mundësia që dy vendet të plotësohen me prokurorë të komanduar, por që e kanë kaluar vettingun.
“Në 10 muaj KLP ka ngritur infrastrukturën ligjore solide për ngritjen e SPAK. Këshilli është në hapat e fundit për dy procese të rëndësishme: zgjedhjen e prokurorit të përgjithshëm dhe ngritjen e SPAK.
Këshilli po shikon hapësirat ligjore për ngritjen e SPAK-ut me 8 prokurorë tashmë të vetuar dhe 2 prokurorë të komanduar nga lista e kandidatëve të kualifikuar për SPAK të cilët kanë kaluar vetingun me vendim të formës së prerë.
Mbështetja e ambasadës amerikane dhe misionit të asistencës së OPDAT gjatë këtyre proceseve, garant për profesionalizmin dhe integritetin e tyre” tha ai. Ndërkohë që Andrews ka shprehur mbështetjen e plotë të SHBA-së për zbatimin e reformës në drejtësi. Ai tha se është i ndërgjegjshëm për presionet ndaj prokurorëve por shtoi se do të mbrojnë SPAK-un.
“SHBA do të vazhdojë të mbështetëse zbatimin e reformës në drejtësi në Shqipëri. Do t’ju ofrojmë asistencën tonë gjatë punës tuaj. Jemi te ndërgjegjshëm për presionin me te cilin përballet KLP dhe jemi te vendosur t’ju ofrojmë mbështetjen tonë për mbrojtjen e prokurorëve të SPAK.
Keni ngritur një bazë ligjore të fortë për institucionet e reja të drejtësisë, e aftë të mbajë larg korrupsionin dhe presionin e politikes mbi këto struktura. Duhet ndryshuar mentaliteti për të luftuar korrupsionin dhe krimin të organizuar në vend sepse tani do të keni instrumentet e duhura” tha ai.
Jorgan K. Andrews është caktuar në Byronë Ndërkombëtare të Narkotikeve dhe Çështjeve të Zbatimit të Ligjit ku mbikqyr programet e kësaj byroje në Europë, Azi, duke përfshire edhe Afganistanin dhe Pakistanin.
Pikërisht për ngritjen e SPAK-ut u zhvillua një debat i fortë dje në mbledhjen e KLP-së që zgjati vetëm 3 minuta. Sipas ligjit parashikohet që funksionimi i SPAK nuk duhet të jenë më pak se 10 prokurorë, por deri më tani janë 8 prokurorë që kanë kaluar Vettingun me vendim të formës së prerë.
Tre prej prokurorëve garues nuk kanë dalë ende në Vetting, e ndërsa për disa të tjerë pritet vendimi i Kolegjit të Posaçëm të Apelimit, për të pasur një vendim përfundimtar nëse do të kalojnë ose jo procesin e Vettingut.
Ndërkohë, që sot Ibrahimi tha se po shikohet mundësi që dy vendet të plotësohen nga prokurorë të komanduar që kanë kaluar Vettingun. Më të përfolur janë Dritan Prençi dhe Vladimir Mara. Edhe këta dy prokurorë ishin garues për të qenë pjesë e SPAK, por pas pikëzimit nuk mundën të ishin në listën përfundimtare të 15 emrave që do të kalojnë në Prokurorisë e Posaçme. /Shqiptarja.com
Prokurorët që kanë kaluar vettingun me vendim të formës së prerë
Altin Dumani
Arben Kraja
Doloreza Musabelliu
Klodian Braho
Edvin Kondili
Ened Nokuçi
Elida Kaçkini
Behar Dibra
