Prokuroria e Posaçme ka në dorë një sërë dosje të rëndësishme korrupsioni. Deri më tani SPAK ka goditur në nivele të ulëta, por sinjalet janë se mund të kemi goditje akoma dhe më të forta në muajt në vijim.
Gazeta ka mësuar një sërë detajesh mbi personat që po heton SPAK, ku kemi të bëjmë me një listë emrash shumë të rëndësishëm. Ndër emrat kryesorë të paditur në SPAK, është ish-kryeministri Sali Berisha. Ndaj tij ka 3 padi, por ajo e cila po verifikohet momentalisht është padia që ka bërë kreu i grupit parlamentar të PS, Taulant Balla mbi privatizimin e Kompleksit Partizani.
Gazeta ka mësuar nga burime brenda SPAK se ajo dosje është në fazën e verifikimit paraprak, pra ku po shytohen argumentet e dhëna nga paditësi dhe më pas nëse prokurorit i lind dyshimi i arsyeshëm se kemi të bëjmë me vepër penale, do të kalohet te grumbullimi i fakteve dhe thirrja e dëshmitarëve.
Mësohet se kësaj dosje po i jepet rëndësi shumë e madhe pasi në të vërtetë kemi të bëjmë me një skandal të madh, ku ka përfituar dhëndri i ish-kryeministrit. Ndërkohë dy paditë e tjera ndaj tij janë një e Izet Haxhisë dhe tjetra e juristit Romeo Kara për aferën CEZ-DIA.
Ministrat e ish-ministrat
Në SPAK ka dosje për 4 ish-ministra dhe 3 ministra aktualë. Nëse marrim ish-ministrat, kemi Arben Imamin, ish-ministër i Mbrojtjes i paditur nga Tulant Balla për privatizimin e Kompleksit Partizani. Emër tjetër është Fatmir Mediu, i paditur për shpërthimin në Gërdec.
Dosja për të ka kaluar në gjykatë dhe vijon beteja në Apel. Ndërkohë ka një padi ndaj ish-ministrit të Shëndetësisë, Ilir Beqja, për aferën me koncesionet në shëndetësi. Po ashtu është paditur dhe ish-ministri Sandër Lleshaj nga PD, për ndërhyrje në regjistrin e adresave para zgjedhjeve.
Ndërkohë një dosje komplekse është ajo e inceneratorëve ku janë paditur disa ish-ministra, por që mbetet të shihet në vijim nëse do zbërthehet nga SPAK. Sa i takon ministrave, PD ka bërë disa padi ndaj ministres së Transporti Belinda Balluku, sidomos sa i takon portit të Vlorës dhe atij të Durrësit.
Po ashtu ka dy padi ndaj ministrit të Mjedisit Blendi Klosi. E paditur është dhe ministrja e Kulturës, Elva Margariti, sidomos sa i takon Teatrit Kombëtar. Në listën e SPAK është dhe një deputet që po hetohet. Bëhet fjalë për deputetin socialist Ervin Bushati, i cili në shtator largohet nga Parlamenti. Ai po hetohet pas një kallëzimi nga PD për fshehje pasurie.
Pushteti lokal
Numri i padive më të shumta është për pushtetin lokal, ku janë paditur disa drejtues e ish-drejtues, por gazeta ka përzgjedhur rastet më të fundit. PS ka paditur dy ish-kryebashkiakë, atë të Prrenjasit dhe atë të Kamzës, duke i akuzuar pse kanë abuzuar me detyrën.
PD nga ana e saj ka paditur disa emra, ku mund të përmendim rastin më të fundit kryebashkiakun e Mallkastrës, i cili u padit për falsifikim formulari, sa i takon dekriminalizimit. Po ashtu PD ka paditur kryebashkiakun Valiaj dhe kryebashkiakun e Elbasanit. Pra ka një sërë dosjesh të bujshme në SPAK dhe sinjalet janë se do të kemi zhvillime.
