Ditën e djeshme, fakte të reja u bënë publike lidhur me “audio-përgjimin” që u publikua dhe trumbetua nga opozita, si zbulimi që do sillte rrëzimin jo vetëm të ministrit të Brendshëm, por të të gjithë Qeverisë.
Dhe kur të gjithë po prisnim qëndrimin, apo qoftë dhe shfajësimin, pasi ndjesa do ishte kërkesë e tepërt për kryetarin e selisë, prej nga ku u reklamua audio më e dëgjuar e muajve të fundit, Lulzim Basha u shfaq me një melodi të re, nëntitullin “Të çlirojmë zgjedhjet nga krimi”.
Por para recitimit të 4 pikave të planit të ri deri për zgjedhje, publiku pret prej tij sqarimet për recitimet e bëra live nga selia e tij dhe përgjigje për 4 pyetje që po qarkullojnë prej ditës së djeshme në mendjet e qytetarëve:
-Sa dijeni ka Lulzim Basha për pagesën e premtuar dhe të marrë nga Babalja (Albert Veliu) dhe Fredi Alizoti?
-A ka pasur dijeni Lulzim Basha për bisedat që ka kryer Ervin Salianji, “Babalja” dhe Jetmir Olldashi?
-Kur është informuar Lulzim Basha nga Ervin Salianji, që në regjistrimin audio, rolin e Geron Xhafajt e luante Fredi Alizoti?
-Çfarë roli ka pasur një nga rojet e Lulzim Bashës, me nofkën “gishtpremi”, në pagimin dhe strehimin e Babales dhe Alizotit?
Deri në shfaqjen e radhës, kryetarit të opozitës mund t`i duhet pak kohë, që suksesin e performancës së tij mos ta mbështesë këtë herë vetëm në buzëqeshjen karakteristike, por të bëjë kujdes në vargjet që do të riprodhojë, për të shpëtuar veten nga telashi që kërkon t’ia futi djaloshit shejtan dhe të përlyer keq, nga Komuna Gore e Korçës.
Pyetje të shumta do vijojnë të bëhen çdo ditë, deri kur kryetari i opozitës shqiptare të tregojë të vërtetën e madhe: Atë që do e çlirojë atë vetë, por më shumë Opozitën shqiptare, nga “Platforma Babale”.
