Paul Guadalupe Gonzales, 45 vjeç, përballet me 11 akuza zhvatje dhe 2 akuza zhvatje e mbetur në tentativë pasi joshte gra në restorante të mira, porosiste pjata të shtrenjta dhe më pas zhdukej, duke ua lënë faturën viktimave.
“Ishte poshtëruese,” tha një prej viktimave që kërkoi të identifikohej me emrin Jane për CNN. “U acarova. Më bëri të ndihem shumë keq.”
Jane tha se shkroi një çek me vlerë $218 për të paguar faturën e darkës, fill pasi Gonzales ia mbathi nga restoranti.
Ajo thotë se u njohën në Bumble, një aplikacion të posaçëm për njerëzit që kërkojnë një lidhje romantike.
“Folëm për ca kohë. Ishte i këndshëm,” vazhdon Jane. “Më tha: ‘Pse të mos takohemi diku?’”
Jane tha se Gonzales porositi pije dhe pjatën më të shtrenjtë në restorant, i cili është një biftek me vlerë $48. Pasi u ulën, Gonzales i tha Jane se më vonë duhet të bënte një telefonatë të rëndësishme, për të kontrolluar gjendjen shëndetësore të një tezeje në spital. Pasi hëngri, Gonzales u largua për të bërë telefonatën dhe s’u kthye më.
“Iku pasi kishte ngrënë shumicën e pjatave,” thotë Jane. “S’kam parë njeri të hajë aq shpejt.”
Ajo s’e kuptoi menjëherë se Gonzales ishte larguar për t’i ngecur faturën.
