Aksioni opozitar duket se ka marrë një kthesë 180 gradë. Pavarësisht paralajmërimeve se në shtator do të riktheheshin protestat e fuqishme, Partia Demokratike ka bërë një hap pas. Mbrëmjen e të enjtes kryedemokrati Lulzim Basha zhvilloi një mbledhje me aleatët e tij në selinë blu, ku në fokus të diskutimit ishte aksioni opozitar. Por kur të gjithë prisnin që në këtë mbledhje të vendosej edhe data se kur do të zhvillohej protesta, nuk ka ndodhur aspak kështu. Gjatë një prononcimi për mediat, pas mbledhjes, Basha deklaroi se nuk ka ende një datë se kur opozita do të thërrasë qytetarët në protestë. Mirëpo, gazeta mësoi disa nga arsyet që detyruan liderin e opozitës, që të mos marrë asnjë vendim, sa i takon nisjes së protestave. Sipas informacioneve nga selia blu, kanë qenë amerikanët, ata të cilët kanë detyruar Bashën që të tërhiqet për momentin nga protestat. Shkak kanë qenë informacionet që ata dispononin se ndaj Bashës kishin nisur presionet nga ish-kryeministri Sali Berisha dhe Presidenti Ilir Meta, të cilët i kërkonin protesta të fuqishme dhe një datë fikse se kur do ta rrëzonte qeverinë. Kështu që, të ndodhur përpara kësaj situate, amerikanët përmes zyrtarit të Departamentit Amerikan të Shtetit, David Kostelancik, i cili vizitoi Tiranën gjatë kësaj jave, i vunë ultimatum kryedemokratit që të refuzojë skenarët destabilizues. Burime nga selia blu, pohuan për gazetën se gjatë takimit që zoti Kostelancik zhvilloi me shefin e selisë blu ia ka bërë të qartë Bashës se SHBA mbështet tubimet demokratike, por nuk i toleron protestat e dhunshme dhe mos bindjen civili. Pra, Basha është tërhequr për momentin nga protesta, duke u prishur kështu planet edhe Berishës dhe Metës. Ndërkohë, në takimin që pati me Bashën, zoti Kostelancik ia bëri të qartë atij se 30 qershori është çështje e mbyllur dhe se për amerikanët ato janë zgjedhje legjitime.
Dilema në PD për rikthimin e protestave
Por tërheqja e kryedemokrati Lulzim Basha nga protestat dhe skenarët destabilizues, duket se kanë futur në dilemë edhe vetë Partinë Demokratike. Gazeta kontaktoi disa krerë degësh të PD, të cilët pohuan se opozita nuk është gati për protesta dhe se presin që lideri demokrat t’i thërrasë në takim, në mënyrë që t’i informojë ata, sa i takon aksionit opozitar dhe të vendosin edhe datën se kur do të nisin protestat. Megjithatë, në kushtet kur strategjia e ndjekur deri më tani e opozitës kundër qeverisë nuk po jep efekt, mësohet se Basha ka vendosur që protestat t’i kalojë në plan të dytë. Sipas informacioneve, mësohet se fokusi kryesor i demokratëve do të jetë bërja publike e një platforme gjithëpërfshirëse, të cilën Basha do ta shpalosë gjatë një turi takimesh që pritet të ketë në gjithë Shqipërinë me qytetarët. Pra, përmes kësaj strategjie Basha po tenton që të fitojë zemrat e qyetarëve dhe t’i bindë ata se kjo qeveri nuk vlen.
LSI rrit presionet ndaj Bashës
Përveç Presidenti Ilir Meta dhe mediave pranë tij, presionet ndaj Bashës janë rritur edhe nga zyrtarë të Lëvizjes Socialiste për Integrim. Shkak është bërë sinjali që dha kryedemokrati dy ditë më parë për t’u ulur në tryezë me kryeministrin Rama, ndërsa foli për një platformë kombëtare mes palëve për zgjidhjen e krizës politike që pritet të nisë me reformën zgjedhore. Ka qenë ish-deputeti Edmond Panariti, i cili gjatë një prononcimi për mediat dje i bëri thirrje Bashës se LSI nuk do të pranojë tryezë dialogu vetëm PS-PD si në rastin e dy viteve më parë, që u arrit pakti i 2017. Panariti thotë se Lulzim Basha ka nxjerrë mësime nga ajo që ndodhi natën e 17 majit, prandaj në negociata opozita sipas tij, duhet të përfaqësohet si grup. “Dialogu do të jetë si grup opozitar, përfaqësim të integruar të opozitës në bisedën me qeverinë për të gjetur një zgjidhje nga kjo krizë, në fakt jo me qeverinë, por me PS. Por do të jetë dialogu që do të prevalojë për të gjetur një zgjidhje”, deklaroi Panariti.
Rigels Seliman
