Reforma në drejtësi pritet që të sjellë ndryshime të forta në organizimin gjyqësor në vend. Përveç largimit të gjyqtarëve të korruptuar, pritet të rrudhet numri i gjykatave në vend. Nga parashikimet paraprake, është thënë se nga 37 gjykata në vend, 10 apo 12 prej tyre, do të shkrihen, ku përfshihet gjykata në Pukë, Kavajë, Burrel dhe Sarandë.
Në një intervistë televizive, Ramin Gurbanov, presidenti i Komisionit Evropian për Efikasitetin në Drejtësi në Këshillin e Evropës, tregon për ndryshimet që do të bëhen në gjykatat në Shqipëri, ndërsa pikë kyçe, cilëson hartën e gjyqësorit dhe aksesin. “Ne kemi hartuar dokumente dhe udhëzime mjaft të rëndësishme dhe njëra ka të bëjë me hartën e gjyqësorit dhe aksesin. Lidhen me disa kërkesa kryesore që kanë të bëjnë me aspektin gjeografik, me numrin e popullsisë dhe densitetin e qytetarëve në zona të caktuara, dhe përveç kësaj, ka edhe aspekte të rëndësishme që duhen marrë parasysh nga qeveri, që lidhen për shembull me transportin dhe aksesin”, deklaroi presidenti i CEPEJ. Ideja për shkrirjen e disa gjykatave në vend, ka ardhur për shkak se, gjykatat që do të shpallen jo funksionale, numri i çështjeve në shqyrtim, është i vogël.
Gjykatat pas “shkrirjes”
Presidenti i CEPEJ, Ramin Gurbanov gjatë fjalës së tij, tregoi me detaje sesi do të funksionojnë gjykatat që do të shkrihen, ndërsa deklaroi hapur një avantazh të këtij ndryshimi. “Në vendet lindore të Evropës ka patur raste ku gjykatat janë shkrirë, por ajo që ne bëjmë pra speezh, është se mbajmë ndërtesat ekzistuese të gjykatave, por ndryshon menaxhimi, ato kanë një menaxhim të vetëm të disa ndërtesave. Aty ku kuptohet se një gjyqtar apo gjyqtare e caktuar nuk ka shumë çështje. Çështja nuk lidhet me një juridiksion të caktuar, por me gjyqtarin”, shprehet Ramin Gurbanov.
Përmirësimi i gjykatave në vend
Duke theksuar mbështetjen e ndërkombëtarëve për këtë çështje, presidenti i Komisionit Evropian për Efikasitetin në Drejtësi në Këshillin e Evropës, Ramin Gurbanov nuk lë pa përgëzuar qeverinë shqiptare, që sipas tij, ka shfaqur vullnet të fortë politik për ndërmarrjen e reformës në drejtësi. “Ne kemi një projekt shumë të suksesshëm në bashkëpunim ndërmjet Këshillit të Evropës dhe Bashkimit Evropian, për efikasitetin dhe përmirësimin e cilësisë së gjyqësorit në Shqipëri. Qeveria shqiptare ka treguar vullnet të fortë politik me ndërmarrjen e kësaj reforme kaq të gjerë e të thellë në gjyqësor, në mënyrë që të rritej cilësia por edhe pavarësia. Këshilli i Lartë Gjyqësor u formua në përputhje me standardet për të siguruar një funksionim të pavarur dhe llogaridhënës të sistemit të gjykatave, duke rritur funksionin efikas të gjykatave. Këshilli i Lartë Gjyqësor, luan një rol mjaft domethënës dhe të rëndësishëm në lidhje me gjyqësorin, në të gjitha vendet, në veçanti ato sigurojnë promovimin, por edhe mbrojtjen e të drejtave të njeriut, synimin e ligjit dhe funksionimin e pavarur dhe transparent të gjyqësorit në vend”, sqaron Ramin Gurbanov, presidenti i CEPEJ. Lidhur me ndryshimin në hartën gjyqësore, pritet që mbledhja për të shqyrtuar këtë temë, do të zhvillohet në datën 1 tetor nga Këshilli i Lartë Gjyqësor, të mbështetur dhe nga Komisioni Evropian për efikasitetin e drejtësisë. Ndërsa kujtojmë që nga maji i 2018, gjyqtarët në vend, janë përballë me Komisionin e Pavarur të Kualifikimit, ku janë hetuar për tre kritere të rivlerësimit, atë të pasurisë, figurës dhe aftësitë profesionale.
