Brenda muajit pritet që të vuloset çështja e Prokurorisë së Posaçme Antikorrupsion. Duke qenë se ndërkombëtarët i kanë sytë te SPAK, KLP pritet të vihet në lëvizje me qëllim që lufta antikorrupsion të nisë sa më shpejt. Ditën e djeshme nënkryetari i KLP Alfred Balla, në një reagim për media u shpreh se brenda muajit tetor do të bëhet e mundur ngritja e Strukturës së Posaçme Antikorrupsion, duke shtuar se shumë shpejt do të ketë një vendimmarrje për numrin e anëtarëve të SPAK.
“Jemi në pritje të mbarimit të procedurave të ankimimit për dy kandidatë të SPAK. Është Këshilli që do vendosë nëse do fillojmë me 10 apo me më pak se 10. Brenda muajit tetor mund të kemi një vendimmarrje”, u shpreh Balla. Deri më tani, Komisioni i Pavarur i Kualifikimit ka kaluar në veting për të tre kriteret 10 prokurorë, nga të cilët 7 janë zyrtarisht prokurorë për SPAK, pasi vendimi për ta nuk është ankimuar nga Komisioneri Publik. Ndërkohë që për prokuroren Elida Kaçkini afati i ankimimit mbaron ditën e nesërme. Nëse edhe për Elida Kaçkinin nuk do ketë asnjë ankimim nga Komisioneri Publik, SPAK pritet që të nisë punën me 8 prokurorë. Deri tani, është apeluar vendimi i KPK për Besnik Muçin dhe Manjola Kajana. Për Besnik Muçin ka nisur beteja në Kolegjin e Posaçëm të Apelimit, ndërsa për Manjola Kajanën është përcaktuar vetëm trupa gjykuese. Pra, deri tani 7 prokurorë mund të quhen zyrtarisht anëtarë të SPAK, ndërsa 3 të tjerë janë ende në pritje. Por duke iu referuar kushtit që BE i vendosi Shqipërisë, SPAK do të ngrihet me më pak se 10 prokurorë, çka do të thotë se brenda muajit tetor kjo strukturë do jetë funksionale.
Tjetër emër në veting
Teksa pritet skadimi i afateve për Kaçkinin, KPK ka avancuar me vetingun për një tjetër emër. Në datë 4 tetor do të dalë para komisionit të vetingut Anita Jella, e cila është kandidatja e 11 që del në seancë dëgjimore. Kjo do të thotë se SPAK është afër.
Gent Ibrahimi informon ndërkombëtarët
Por në kohën kur SPAK është gati për të nisur punën, kreu i Këshillit të Lartë të Prokurorisë, Gent Ibrahimi ka informuar ndërkombëtarët mbi ecurinë e reformave të ndërmarra deri tani në Shqipëri. Kreu i KLP-së, gjatë një vizite në Hagë zhvilloi një takim me Presidentin e Eurojust, Ladislav Hamran. Takimi i Gent Ibrahimit u bë në kuadër të prezantimit të zbatimeve të reformës në drejtësi, si dhe krijimin e institucioneve të reja, siç janë SPAK dhe BKH. Nga Haga, Ibrahimi u shpreh se Eurojust do bashkëpunojë ngushtësisht me SPAK dhe BKH për të luftuar korrupsionin dhe krimin e organizuar në nivele të larta. “Angazhim maksimal për përfaqësim të përhershëm në Eurojust dhe bashkëpunim të ngushtë me partneret evropianë në nivel operacional dhe shkëmbim informacionit. Kemi nënshkruar tashmë marrëveshjen bashkëpunimi me Eurojust dhe do të caktojmë së shpejti një prokuror pranë saj. Eurojust do të bashkëpunoj me SPAK dhe BKH në operacione ndërkombëtare në luftën kundër korrupsionit dhe krimit organizuar”, u shpreh Ibrahimi. Kreu i KLP kërkoi vazhdimin e asistencës dhe ekspertizës juridike holandeze për zbatimin e reformës në drejtësi dhe ngritjen e institucioneve të reja, SPAK dhe BKH. /Elisjeda Kiko
