Këshilli i Lartë i Prokurorisë miratoi gjatë mbledhjes së djeshme dorëheqjen e prokurorit pranë Prokurorisë për Krime të Rënda, Njazi Seferi. Ndonëse Seferi nuk është përballur ende me filtrat e vetingut, dha dorëheqjen nga detyra për arsye shëndetësore. Seferi ndryshe njihet dhe si prokurori i “Kacifas”. Prokuroria e Krimeve të Rënda u përfshi në ngjarjen e Bularatit, ku gjatë shkëmbimit me armë zjarri ndaj policisë u vra shtetasi Konstandinos Kacifas.
Por ndonëse nuk iu nënshtrua vetingut sa i përket anës pasurore, prokurori i Krimeve të Rënda ka deklaruar vetëm pagën e tij nga viti 2003-2007. Në vitin 2008, Njazi Seferi ka deklaruar blerjen e një apartamenti 56 m2 me vlerë 4 000 000 lekë. Në vitin 2009, Seferi ka deklaruar një shumë kursimesh, vlera e të cilave arrin në 1 300 000 lekë. Ndërsa një vit më pas, në 2010 ai ka deklaruar një autoveturë që kushton 500 000 lekë dhe shtimin e kursimeve nga 1 300 000 lekë janë bërë 1 423 206 lekë. Ndërsa në lidhje me pagat, këtë viti ka shtuar edhe pagën e vajzës. Në vitin 2011 ai ka deklaruar shtesë të ardhur neto në vlerën 1 989 332 lekë si dhe të ardhurat nga paga të dy fëmijëve dhe bashkëshortes. Në vitin 2012 ai ka deklaruar sërish shtesë në të ardhura në shumën 2 217 461 lekë. Në vitin 2013 ai ka deklaruar shtesë në atë ardhura në vlerën 2 235 112 lekë, blerjen e një apartamenti me sipërfaqe 54.4 metër katror në vlerën 4 080 000 lekë, blerjen e një makine nga djali me vlerën 2 000 euro. Në vitin 2014 ai ka deklaruar shtesë nga kursimet në shumën 2 775 797 lekë. Në vitin 2015 ai ka deklaruar se janë shtuar të ardhurat me 1 200 000 lekë, si dhe pagat.
Shkarkimi i Besnik Muçit
Përveç mbledhjes që zhvilloi KLP, edhe KPA zhvilloi ditën e djeshme një seancë për prokurorin e Krimeve të Rënda, Besnik Muçi. Ky i fundit dorëzoi dhe dy prova të tjera, që kanë të bëjnë me transaksione bankare të familjarëve të tij, për të vërtetuar ligjshmërinë e pasurisë së tij. KPA vendosi që të administronte si provë raportin e Drejtorisë së Sigurimit të Informacionit të Klasifikuar të paraqitur nga Operacioni Ndërkombëtar i Monitorimit. Sipas Komisionerit Publik, prokurori Muçi nuk arrin të justifikojë pasurinë nga burime të ligjshme. Gjithashtu Komisioneri u shpreh se provat e paraqitura nga ky prokuror nuk provojnë të kundërtën e ankimimit. Komisioneri Publik argumenton se, Besnik Muçi nuk ka depozituar dokumentacion as për burimin e të ardhurave nga babai i tij dhe as për të ardhurat nga emigracioni. “Gjatë parashtrimit mbi vlerën provuese të provave të depozituara nga subjekti i rivlerësimit në seancën paraardhëse, Komisioneri Publik deklaroi se as me këto akte të reja, subjekti i rivlerësimit nuk arrin të provojë bindshëm burimin e ligjshëm të krijimit të pasurisë së tij dhe të personave të lidhur me të. Subjekti i rivlerësimit kërkoi marrjen si provë të dy dokumenteve të reja bankare në funksion të shqyrtimit të çështjes, kërkesë që u pranua nga trupi gjykues. Gjithashtu, në zbatim të vendimit për marrjen si provë të dokumentit të DSIK-së, trupi gjykues vendosi t’i kërkojë organit kompetent që në një kohë sa më të arsyeshme, brenda limitit kohor prej 15 ditësh të përcaktuar me ligj, të kryejë deklasifikimin e dokumentit të konsideruar “sekret””, thuhet në njoftimin e KPA. Seanca e radhës për Besnik Muçin do të jetë më 16 tetor ora 12:00. “Në pritje të përgjigjes së organit kompetent, trupi gjykues vendosi të shtyjë seancën gjyqësore për në datën 16.10.2019, ora 12:00”, njoftoi KPA. /Elisjeda Kiko
