Kryeministri Edi Rama pritet t’i shkojë deri në fund shkarkimit të presidentit Ilir Meta nga detyra. Kur u betua në korrik të vitit 2017, Meta u shpreh se do të qëndronte mbi palët dhe ishte i bindur se LSI, madje opozita nuk do të ndikonte aspak në punën e tij si President i Republikës. Por tanimë po bëhen plot 26 muaj që ai është në krye të shtetit dhe Meta rrezikon të mbahet mend si presidenti që ka luftuar më ashpër me qeverinë.
Megjithatë, kjo pak rëndësi ka, pasi lufta e nisur mes Presidencës dhe mazhorancës është prezent edhe sot, në dijeni të së cilës nuk janë vetëm qytetarët shqiptarë, por edhe kancelaritë botërore. Gazeta ka përmbledhur në mënyrë të detajuar disa nga përplasjet e ndodhura mes kreut të shtetit dhe qeverisë, ku thuajse në shumicën dërrmuese të tyre “fajtori”, apo ai që i ka hedhur benzinë zjarrit ka qenë Ilir Meta. Ky i fundit gjatë gjithë kësaj kohe, e ka sulmuar qeverinë “Rama” më shumë se opozita, ndërkohë që sa i takon bashkëpunimit institucional, ka thyer rekordin si presidenti që i ka kthyer ligjet dhe bllokuar nismat e qeverisë, më shumë se çdo president tjetër qysh kur Shqipëria ekziston si shtet.
Ja disa nga arsyet pse Rama do shkarkojë Metën
Por të gjitha këto veprime me “paramendim” të kryera nga Meta, detyruan mazhorancën që t’ia kthejë me të njëjtën monedhë presidentit, teksa së fundmi ka ndërmarrë një nismë për ta shkarkuar atë nga detyra, duke e akuzuar se është bërë palë me opozitën joparlamentare dhe se për të, ka shkelur me të dyja këmbët Kushtetutën e Shqipërisë. Po cilat janë disa nga arsyet pse Rama do t’i shkojë deri në fund shkarkimit të Ilir Metës? E para dhe më e freskët ka të bëjë me zgjedhjet lokale. Në dhjetor të vitit të kaluar Meta dekretoi 30 qershorin si datën, kur qytetarët duhet t’iu drejtohen kutive të votimit për të zgjedhur drejtuesit vendorë. Mirëpo, kur palët po përgatiteshin për zgjedhje, më konkretisht në muajin maj të këtij viti, presidenti Meta lajmëroi një konferencë të jashtëzakonshme shtypi, duke firmosu LIVE zhdekretimin e zgjedhjeve vendore. Meta e argumentoi këtë vendim me arsyen se i anuloi zgjedhjet për t’i dhënë kohë edhe opozitës që kishte bojkotuar Parlamentin që të merrte pjesë në zgjedhje, ndërsa hodhi akuza në adresë të kryeministrit Rama, duke e quajtur arrogant. Ndërkohë, disa ditë më vonë, pasi kishte anuluar zgjedhjet e 30 qershorit, Meta nxori një dekret të ri për zgjedhje, duke shtuar se arsyeja kryesore se pse anuloi vendoret ishte fakti se evitoi gjakderdhjen. Por të gjitha këto pretendime të Metës, mazhoranca i injoroi, ndërsa këto manovra të tij, i ka përdorur si pretekst për ta shkarkuar nga detyra. Pra, anulimi i zgjedhjeve është një nga arsyet se përse Rama duhet ta shkarkojë Metën nga detyra.
Presidenti kërcënim për ligjet dhe ndryshimet në qeveri
Një tjetër arsyet pse kryeministri Rama do t’i shkojë deri në fund shkarkimit të Ilir Metës është fakti se presidenti është kthyer në një kërcënim për qeverinë, pasi i ka kthyer mbrapsht asaj shumë ligje. Megjithatë, mes këtyre ligjeve të kthyera janë edhe buxheti apo projekte publike, për të cilat koha nuk pret dhe duhet të miratohen. Kështu që, duke qenë se ai po i bën barrikadë qeverisë për ligjet, shefi i qeverisë është i detyruar ta shkarkojë atë, në mënyrë që të mos ketë pengesa të kësaj natyre. Po ashtu, Meta është kërcënim për qeverinë Rama dhe sa i takon ndryshimeve në qeveri. Presidenti pak kohë më parë refuzoi të dekretonte Gent Cakajn në krye të Ministrisë së Jashtme dhe Sandër Lleshajn në krye të Ministrisë së Brendshme. Pra, duke qenë se qeveria ka pa konsumuar edhe dy vite, Rama duhet ta shkarkojë Metën, në mënyrë që të evitojë bllokimin e ndryshimeve në qeveri. Ndërkohë, një tjetër arsye se përse Meta duhet shkarkuar nga Rama, është se ai është një kërcënim për reformën në drejtësi dhe marrëdhëniet me ndërkombëtarët, sidomos sa i takon integrimit të Shqipërisë në BE, pasi është hedhur në sulm ndaj tyre. Ndërkohë, një tjetër arsye pse Rama do t’i shkojë deri në fund shkarkimit të Ilir Metës, është fakti se ky i fundit nuk njeh Parlamentin dhe opozitën e re parlamentare.
Rigels Seliman
