Këshilli i Lartë i Drejtësisë pritet të vulosë sot fatin e Prokurorisë së Posaçme. Pas bllokimit që ju bë seancës ditën e hënë, sot në orën 10:00, KLP do të marrë vendimin për ngritjen e SPAK me skemën 8+2. Gjatë takimit që pati me Jorgan K. Andrews, Zëvendës Ndihmës Sekretar i Shtetit të SHBA, kreu i KLP Gent Ibrahimi, bëri të ditur se KLP po mendon një skemë të re për të mos vonuar ngritjen e SPAK.
Momentalisht vetëm 8 kandidatë për Prokurorinë e Posaçme e kanë kaluar vetingun në të dyja shkallët. 2 të tjerë janë ankimuar në Apel, një është në pritje të zbardhjes së vendimit dhe 4 kandidatë, nga 15 në total, nuk kanë hyrë në proces rivlerësimi. Por duke qenë se ndërkombëtarët po kërkojnë që të mos ketë më vonesa, është hedhur në skenë skema 8+2. Pra 8 prokurorët që kanë kaluar vetingun do të emërohen dhe 2 të tjerë do të komandohen. Këta të fundit do gjenden nga lista e të s’kualifikuarve, por që dhe ata e kanë kaluar vetingun në të dyja shkallët. Sot KLP do të mblidhet për të diskutuar për këtë skemë dhe nëse jepet aprovimi nga më shumë se gjysma e anëtarëve, atëherë brenda nëntorit kjo strukturë do të jetë gati. Nga ana tjetër duhet theksuar se ndërkombëtarët janë sy e veshë te KLP. Në njoftimin që u është shpërndarë dje mediave, bëhet e ditur se në seancë do të ketë dhe vëzhgues të Euralius dhe OPDAT. Sipas burimeve, edhe skema 8+2 ka lindur në bazë të konsultimeve me ta. Kanë qenë ekspertë e SHB-BE ata që kanë mbështetur këtë ide në mënyrë që të nisë sa më shpejt lufta ndaj të korruptuarve.
Emrat
8 emra e kanë kaluar me sukses vetingun janë: Altin Dumani; Arben Kraja; Doloreza Musabelliu; Klodian Braho; Edvin Kondili; Ened Nokuçi; Elida Kaçkini; Behar Dibra, të cilët automatikisht, janë pjesë e SPAK. Por KLP ka vendosur që të marrë dhe dy emra nga 7 emrat e tjerë që mbetën jashtë listës me 15 emra, të cilat janë: Besim Hajdarmataj; Donika Prela; Dorina Bejko; Dritan Prençi; Enkeleda Xhengo; Maksim Sota; Vladimir Mara, por, vetëm Hajdarmataj, Prela, Prençi dhe Mara janë konfirmuar. Ky nuk është i vetmi problem, pasi për Hajdarmatajn ende nuk është zbardhur vendimi dhe nuk dihet nëse do ketë ankimim në Apel, ndërsa Prela, vijon të jetë në hetim nga KPA dhe për pasojë, vetëm Mara dhe Prençi plotësojnë kushtet.
Rendi i Ditës
Në Rendin e Ditës, Këshilli i Lartë i Prokurorisë, ka lajmëruar se sot përveç SPAK, do të miratohet caktimi i përkohshëm i disa prokurorëve nga në një qytet, në një tjetër, ose caktimi i tyre kryetar. Në lajmërimin publikuar në faqen zyrtare të KLP, njoftohet se Afërdita Ndoi, prokurore në Prokurorinë pranë Gjykatës së Shkallës së Parë Tiranë, do të kalojë në Durrës; Albert Murçaj, në Prokurorinë e Gjykatës së Shkallës së Parë Shkodër, të marrë postin e kryetarit; Lorenc Mërkuri, prokuror në Prokurorinë në Gjykatën e Shkallës së Parë Sarandë, të marrë po postin e kryetarit; Ludovik Doda, komandohet kryetar Prokurorisë pranë Gjykatës së Apelit Durrës; Ylli Pjetërnika, prokuror në Prokurorinë në Gjykatën e Shkallës së Parë Lezhë, do të kalojë në Tiranë; Urim Buci, prokuror në Prokurorinë pranë Gjykatës së Shkallës së Parë Kurbin, rikthehet në detyrë në Prokurorinë pranë Gjykatës së Shkallës së Parë Dibër. Sot/Ornela Çelpica
