Gjasat që liberalizimi i vizave të jetë dhuratë për Kosovën në prag të Krishtlindjeve janë inekzistente. Përveç Gjermanisë, duket se askush tjetër prej shteteve anëtare të Bashkimit Evropian nuk mendon se kosovarëve duhet t’iu hiqet regjimi i vizave brenda një kohe të shkurtër, derisa Republika e Kosovës të përmbush kushtin për sundimin e ligjit dhe luftimit të krimit të organizuar dhe korrupsionit.
Një gjë të tillë për Gazetën Express e kanë konfirmuar ekskluzivisht burime diplomatike në Francë.
“Për heqjen e regjimit të liberalizimit të vizave kërkohet përmbushja e disa kushteve, përfshirë këtu sundimin e ligjit dhe luftën kundër krimit të organizuar dhe korrupsionit”, ka thënë për Express ky burim diplomatik.
Sipas këtij burimi, përveç Francës, janë edhe disa shtete të tjera anëtare që vlerësojnë se Kosova nuk ka përmbushur të gjitha kushtet, dhe potencon se Parisi zyrtar do të vëzhgojë me vëmendje avancimin e Kosovës në fushën e sundimit të ligjit dhe në luftën kundër krimit të organizuar dhe korrupsionit.
“Franca beson, së bashku me disa shtete anëtare, se Kosova nuk i ka përmbushur të gjitha kushtet, dhe me vëmendje do të përcjellë zhvillimin në fushën e sundimit të ligjit dhe në luftën kundër krimit të organizuar dhe korrupsionit” ka shtuar tutje për Express.
Tutje ky zyrtar i lartë ka thënë se puna e bërë deri tani nga institucionet e Kosovës nuk është e mjaftueshme për të prodhuar rezultate të prekshme, dhe se është e nevojshme që të vazhdohet me zbatim të reformave dh zbatim të qëndrueshëm të tyre.
“Zhvillimet pozitive në këtë fushë, siç është miratimi i disa ligjeve për sundim të ligjit në Parlamentin e Kosovës dhe reformimi në gjyqësor në veçanti, janë të pamjaftueshme për të prodhuar rezultate të prekshme. Zbatimi i vazhdueshëm i reformave është jetike në mënyrë që ligjet të mund të zbatohen në mënyrë të qëndrueshme”, ka thënë ky burim diplomatik për Gazetën Express.
E tema e liberalizimit të vizave për kosovarët do të kthehet për diskutim në Këshillin e BE-së, vetëm atëherë kur të konstatohet se janë përmbushur të gjitha kushtet.
“Kjo temë do të shqyrtohet nga Këshilli i BE-së, dhe do të kthehet për diskutim kur të përmbushen kushtet”, ka përfunduar ky burim diplomatik për Gazetën Express.
