Tentativa e Moskës për të shtrirë ndikimin rus në Ballkan dhe ftesa e përfaqësuesi të Rusisë në BE, Vladimir Chizhov për të gjitha vendet e refuzuara nga Bashkimi Europian që t’i bashkohen Bashkimit Ekonomik Eurazian, ka shkaktuar mjaft debate në vendin tonë.
Të shumtë janë politikanët që kanë reaguar sa i takon kësaj çështje, ndërkohë që pjesë e debatit është bërë edhe Ambasada e Rusisë në Tiranë, e cila ka nisur sulmet ndaj ambasadës amerikane dhe ka kritikuar mazhorancën për rezolutën kundër ndërhyrjeve ruse në Shqipëri. Por alarmin për ndikimin rus në Ballkan dje e ka ngritur edhe ish-kreu i Shërbimit Informativ Shtetëror, Fatos Klosi.
Ky i fundit gjatë një prononcimi për gazetën “SOT”, theksoi se në kushtet kur Moska po përdor refuzimin e çeljes së negociatave për Shqipërinë dhe Maqedoninë e Veriut nga ana e Bashkimit Europian për të shtrirë ndikimin e saj në këto dy shtete, ftesa nuk duhet të pranohet, pasi sipas tij, është e rrezikshme. “Ftesa e Rusisë është tendencioze, pasi po përpiqet ta shfrytëzojë këtë mundësi që sipas asaj, BE i ktheu krahët Shqipërisë, në mënyrë që të rrisë ndikimin e saj në vendin tonë. Kështu që, nëse ftesë Moska e trajton si mbështetje për Shqipërinë, në kushtet kur Bashkimi Europian ktheu krahët është e pakuptimtë dhe përpiqet të bëjë diversion. Por nga ana tjetër nëse ftesa është e sinqertë dhe është një marrëveshje që mund të bëhet për qëllime të mira, nuk shoh ndonjë gjë të keqe. Por në qoftë se ftesa trajtohet kështu meqenëse iu kthyen krahët ata dhe po iu ftojmë ne, nuk duhet pranuar”, deklaroi ai.
Preja më e lehtë janë të korruptuarit
Ish-kreu i SHISH, Fatos Klosi ka ngritur më tej alarmin se preja më e lehtë që Moska synon t’i përdorë për të shtrirë ndikimin e saj në Shqipëri janë të korruptuarit. Kështu që, të ndodhur përpara kësaj situate, zoti Klosi theksoi se vetmja rrugë që të mbash sa më larg Rusinë është lufta me zero tolerancë ndaj të korruptuarve përmes organeve të reja të drejtësisë. Sipas tij, reforma në drejtësi është produkt i amerikanëve dhe se këta të fundit janë të vendosur për ta çuar atë përpara. “SHBA kërkon që t’i shkohet deri në fund luftës kundër korrupsionit, pasi i druhet fakti se Rusia mund të përdorë të korruptuarit në Shqipëri për të shtrirë ndikimin e saj.
Pra, është më e kollaj që të përdorësh të korruptuarit se sa të pakorruptuarit për një çështje të caktuar, pasi të korruptuarit rikorruptohen më kollaj. Kështu që, duke parë këto lëvizje Shtetet e Bashkuara të Amerikës po nxisin luftën kundër korrupsionit dhe besoj se do t’i shkojnë deri në fund kësaj lufte, me qëllimin e vetëm që Shqipëria të pastrohet nga të korruptuarit të cilët Moska mund t’i përdor për qëllimet e saj. SHBA ka investuar shumë për Shqipërinë dhe nuk mund ta lërë në mes investimin e saj”, u shpreh ai.
Shqipëria po përdoret si fushë beteje
Duke komentuar sulmet e fundit të ambasadës ruse në Tiranë në adresë të ambasadës amerikane, ish-kreu i Klosit deklaroi se nuk ka asgjë për t’u çuditur, pasi sipas tij, Amerika dhe Rusia janë në “luftë” me njëra-tjetrën prej kohësh. Megjithatë, zoti Klosi u shpreh i keqardhur që Shqipëria po përdoret si fushë beteje mes Moskës dhe Uashingtonit. “Mua më vjen keq që ambasadat e atashuara në Shqipëri, sikundër është rasti i asaj ruse përdorin Shqipërinë për të luftuar SHBA-të dhe politikat e saj. Pra, duke qenë se Rusia dhe Amerika janë dy superfuqi natyrisht që do të kenë konflikte gjithmonë. Pra, Moska dhe Uashingtoni do të kenë konflikte me njëra-tjetër për zona influence, për tregti, madje për plot gjëra. Kështu që, mua më vjen keq që përdoret Shqipëria dhe fakti që ambasadat bëjnë luftë. Shiko, Shqipëria tashmë e ka caktuar se me kë është dhe ajo është me Perëndimin. Madje, kjo mënyrë që po bëhet këtu nuk ndodh në Itali që të zihet ambasada ruse me atë amerikane në Romë”, nënvizoi Klosi. /Rigels Seliman
