Juristi i OSHEE, Romeo Kara, ka reaguar sa i takon ndryshimit të prokurorit të çështjes së privatizimit të OSSH nga CEZ. Ai është një ndër paditësit dhe në një periudhë rreth një vjeçare, kallëzimi i tij është shqyrtuar nga disa prokurorë.
Në një prononcim për gazetën Sot, Kara deklaron se kjo tregon qartë se Berisha ka ndikim të madh në prokurori dhe askush nuk do të ketë të bëjë me të.
“Deri në ngritjen e Prokurorisë speciale, kjo dosje duhej të shqyrtohej nga Prokuroria e Përgjithshme, pasi Prokuroria e Tiranës as e ka pasur në kompetence një çështje të tillë dhe as do ta ketë në të ardhmen. Ajo çfarë është bërë me këtë dosje, flet për një intimidim të plotë të prokurorisë nga Berisha, pasi u pa fillimisht një shmangie e prokurorisë së përgjithshme, pastaj një pushim tërësisht i pajustifikuar i çështjes nga ana e Prokurorisë së Tiranës si dhe tani një dorëheqje të prokurorit të çështjes.
Realiteti flet qartë dhe me fakte se Berisha përfaqëson dhe kryeson një sistem të tërë klanor, me ndikim absolut në sistemin e drejtësisë, gjë që e bën tepër të vështirë investigimin dhe procedimin normal të kësaj çështjeje”, tha ai.
Juristi ka tregur se si fillimisht ai e bëri padinë në Prokurorinë e Përgjithshme, e cila ja delegoi atë Porkurorisë së Tiranës. Madje sipas tij, prokurorja e çështjes u përdor për të mbyllur hetimet, të cilat u rihapën pas vendimit të gjykatës. Por Kara është i bindur se pas aferës fshihet Sali Berisha.
“Personazhi kryesor i kësaj meseleje është Saliu, prandaj prokuroria duhet të merret me të, në qoftë se ka ndërmend të bëjë seriozisht punën e saj. Po të pyeten si duhet personat e përfshirë në aferë, në Shqipëri dhe jashtë saj, ata me siguri do evidentojnë rolin e Saliut. Koordinimi ERE-METE është bërë patjetër nën hyqmin e tij. Kjo çështje mund të përfundojë pa u zbardhur nga prokuroria, por jo nga unë. I siguroj të gjithë shqiptaret, se kjo çështje është zbardhur mjaftueshëm nga unë, sa t’i vërë keqbërësit qeveritarë përpara ligjit”, tha ai.
Juristi ka shfaqur zhgënjim dhe nga mazhoranca, e cila sipas tij duhet të bënte më shumë për këtë çështje. Kara i ka dërguar dhe një mesazh prokurorisë, duke kërkuar që të heqë dorë nga lidhjet me politikën.
“Prokuroria duhet të hiqte dorë nga pozitat e sejmenit të politikës dhe bërjes kompromis me të, kur u përball me këtë çështje. Ne kërkojmë rezultate dhe zbardhjen e së vërtetës. Pra, ne dhe i gjithë populli kërkojmë diçka ndryshe, atë që deri më tani nuk e kemi, kërkojmë drejtësi.
Është idjotësi të mendosh se do të kemi një rezultat ndryshe duke përdorur të njëjtat metoda e njerëz të cilët na kanë lënë deri më tani në këtë gjendje. Prokuroria nuk duhej që ta kalonte këtë çështje në Prokurorinë e rrethit Tiranë, për arsye kompetence dhe integriteti të ish drejtuesve të kësaj prokurorie. Ia deleguan këtë çështje Petrit Fushës, një prokurori te kompromentuar me Ismailajn”, tha ai.
Kara deklaroi se mënyra se si ka vepruar prokuroria deri më tani, po kompromenton të gjithë sistemin politiko-shoqëror në vend, ku sipas tij, qeveritarët mund të vjedhin e grabisin, pa pasur frikë se mund të përballen me drejtësinë.
