Presidenti Ilir Meta ka marrë një goditje tepër të fortë nga Shtetet e Bashkuara të Amerikës. Kreu i shtetit prej javësh ka nisur një sulm të paprecedentë ndaj ndërkombëtarëve e veçanërisht ambasadës së SHBA dhe të BE. Madje, Meta arriti deri aty sa deklaroi se “Rruga e Elbasanit” të çon në Xibrakë, duke nënkuptuar se ambasada e SHBA është kthyer në rrugë për kokainën.
Në shumë raste ai ka bërë të qartë se Uashingtoni ka tjetër qasje dhe problemi qëndron te ambasada. Mirëpo edhe pse Meta ka sulmuar disa herë ambasadën dhe drejtuesen e saj Leyla Moses Ones, kjo e fundit gëzon mbështetjen totale të Uashingtonit. Departamenti Amerikan i Shteti ka dorëzuar së fundmi në Kongresin Amerikan një raport kontrolli mbi të gjitha ambasadat e SHBA nëpër botë. Raporti është hartuar nga Inspektori i Përgjithshëm Steve A. Linick dhe mes shumë shteteve është dhe një raport për punën e ambasadës së SHBA në vendin tonë. Aty vlerësohet puna e drejtueses dhe konstatohen vetëm disa probleme të brendshme të ambasadës mbi mënyrën e organizmit, ndërsa sa i takon marrëdhënies me autoritet shqiptare vlerësohet puna e saj. “OIG zbuloi se i ngarkuari me punë dhe zv. shef i misionit formoi një grup bashkëpunuesish të përkushtuar për krijimin e atmosferës pozitive për ambasadën”, thuhet në raport. Më tej, në raport theksohet se bashkëpunimi mes ambasadës dhe autoriteteve shqiptare është shumë i mirë.
Presidenti mendon se SHBA-BE kanë ndërhyrë në punët tona, por për DASH ambasada ka qenë shumë korrekte në këtë aspekt. “Seksioni i ambasadës dhe krerët e agjencisë raportuan se bashkëpunimi ishte i shkëlqyeshëm. Aktivitetet e asistencës së huaj ishin të linjëzuara me prioritetet e politikave dhe ambasada po merrte hapa për forcimin e koordinimit”, thuhet më tej. Në raport probleme të vogla shihen te sistemi konsullor. “Puna në grup e seksionit të konsullatës lejoi që të ruhen niveli i lartë i performancës megjithë mangësitë në staf, por nevojiteshin përmirësime për aksesueshmërinë e seksionit , kontrollin dhe komunikimin”, theksohet më tej në raportin dorëzuar në Kongres.
Reforma në drejtësi
Gazeta ka siguruar raportin e plotë të inspektimit në ambasadën e SHBA në vendin tonë. Aty tregohet se si Leyla Moses Ones ka ndërhyrë në momente shumë të rëndësishme të reformës në drejtësi, pasi aktorë të caktuar kanë tentuar bllokimin e saj. Roli i saj vlerësohet nga Uashingtoni. “E ngarkuara me punë ishte e angazhuar gjerësisht me zyrtarë të qeverisë shqiptare dhe të tjerë ambasadorë dhe zyrtarë ndërkombëtarë.
Ajo kishte takime të shpeshta dhe të rregullta me presidentin, kryeministrin, dhe anëtarët e tjerë të kabinetit qeveritar dhe me udhëheqësit e partive politike me qëllim që të përparohet me objektivat. Për shembull, kur kundërshtarët e reformës në drejtësi u përpoqën të shmangin një nismë kryesore të luftës antikorrupsion, e ngarkuara me punë u takua me ministren e Drejtësisë për të diskutuar sesi të bëhet më mirë dhe sesi të kapërcehet ky kundërshtim. Duke punuar së bashku, ata dhanë shumë vërejtje në mbështetje të iniciativës, e cila më pas kaloi, duke ndihmuar në përmbushjen e qëllimit kryesor të ambasadës për të ndihmuar Shqipërinë të zbatojë në mënyrë efektive reformat kryesore të sundimit të ligjit”, thuhet në raportin e inspektimit.
Pra duket se për DASH veprimet e zv/ambasadores kanë ndihmuar në avancimin e reformës në drejtësi dhe jo në kapjen e saj sikundër pretendon presidenti. Duket qartë se ky raport është një shuplakë kundër presidenti. Veprimet e ambasadës kanë qenë të koordinuara me DASH dhe çdo lëvizje ka marrë aprovim nga Uashingtoni. /Kliti Topalli
