Pasuria pritet të fundosë me dhjetra pushtetarë në vend. Të enjten do të bëhet betimi i 8 anëtarëve të SPAK dhe menjëherë do të nisë puna për transferimin e dosjeve. Një ditë më parë gazeta tregoi se vetëm gjatë vitit 2019 plot 113 zyrtarë të lartë kanë fshehur pasuritë e për këtë arsye janë gjobitur nga ILDKP. Por ky institucion, në një reagim për gazetën “SOT”, ka dhënë statistika për 5 vitet e fundit.
Bëhet fjalë për rreth 430 kallëzime penale që nga viti 2014 e deri në dhjetor 2019 për fshehje pasurie. Por me ngritjen e SPAK, një pjesë e madhe e këtyre dosjeve janë ende në proces hetimi dhe do kalojnë aty, veçanërisht për ish-ministra, ministra, ish-deputetë, deputetë, apo krerë bashkish. “Inspektorati i Lartë, gjatë periudhës 2014 – 2018 ka referuar pranë Institucionit të Prokurorisë, strukturave të hetimit tatimor, Drejtorisë së Përgjithshme të Parandalimit të Pastrimit të Parave, si dhe Policisë së Shtetit 315 subjekte, në të cilët janë përfshirë zyrtarë të të gjitha kategorive dhe niveleve, si Deputetë të Kuvendit të Republikës së Shqipërisë, Kryetar Bashkie, Drejtorë Drejtorie etj. Për periudhën janar-tetor 2019, janë paraqitur rreth 101 raste referimesh, ndërsa deri në dhjetor 2019 janë 12 raste të tjera, pra në total, janar-dhjetor 2019 janë 113 raste referimesh”, ka bërë të ditur ILDKP.
Më tej ky institucion ka bërë të ditur se për vitin 2018, ka paraqitur pranë Institucionit të Prokurorisë, strukturave të hetimit tatimor, Drejtorisë së Përgjithshme të Parandalimit të Pastrimit të Parave, si dhe Policisë së Shtetit 53 raste referimesh në të cilët janë përfshirë zyrtarë të të gjitha kategorive dhe niveleve, si Deputetë të Kuvendit të Republikës së Shqipërisë, Kryetar Bashkie, Prefekt, Ambasador, Këshilltar Ministri, Drejtor i Përgjithshëm, Drejtor Drejtorie etj. Një pjesë e madhe e zyrtarëve i takojnë kategorisë së zyrtarëve që janë pjesë e SPAK dhe një pjesë e madhe e dosjeve janë nën hetim. Kjo do të thotë që ato do të transferohen aty.
Dixhitalizimi i deklaratave
Një tjetër element që do të godasë emrat që kanë fshehur pasuritë është dhe dixhitalizimi i sistemit të deklarimit. ILDKP është duke punuar për një sistem online, ku çdokush mund të gjejë fare lehtë deklarimet e pasurisë. Kjo do rrisë transparencën dhe rritjen e denoncimit për raste të caktuara. Ndërkohë ligji i jep të drejtë SPAK që të nisë hetime edhe nga një shkrim mediatik. ILDKP ka dhënë detaje mbi ecurinë e projektit. “Megjithë angazhimin e marrë nga ILDKPKI, së bashku me partnerët ndërkombëtarë, për të garantuar përfundimin e të gjitha fazave të nevojshme për ngritjen dhe vënien në funksionim të sistemit të deklarimit elektronik të interesave privatë, Inspektorati i Lartë ILDKPKI, në zbatim të parashikimeve ligjore ka vijuar punën në drejtim të përmbylljes së procesit të regjistrimit të sistemit si bazë të dhënash shtetërore pranë Agjencisë Kombëtare të Shoqërisë së Informacionit si dhe për miratimin e aktit ligjor të krijimit të bazës së të dhënave shtetërore.
Gjithashtu, për garantimin e një qëndrueshmërie të mëtejshme të funksionimit të vetë sistemit, ILDKPKI-së, ju miratuan nga Parlamenti fondet e nevojshme për realizimin e procesit të mirëmbajtjes së sistemit”, thuhet në deklaratë. Më tej bëhet e ditur se Inspektorati i Lartë, për ngritjen dhe funksionimin e sistemit elektronik të deklarimit të interesave privatë, është asistuar financiarisht dhe teknikisht nga Agjencia e Shteteve të Bashkuara për Zhvillim Ndërkombëtar (USAID), përsa lidhet me pjesën e programimit të sistemit (software) si dhe nga “Instrumenti Horizontal për Ballkanin Perëndimor dhe Turqinë” i bashkë-financuar nga Bashkimi Evropian dhe Këshilli i Evropës, lidhur me sigurimin e pajisjeve (hardware). /Kliti Topalli
