Ish-kreu i Aleancës Kuqezi, Kreshnik Spahiu ka shpërthyer dje në akuza dhe sulme në adresë të klasës politike shqiptare. Përmes një analize të gjatë në rrjetet sociale, ish-kreu i Aleancës Kuqezi u shpreh skeptik për ecurinë e “mini-Shengenit”, ndërsa shtoi se ky projekt i shërben vetëm Serbisë.
Sipas tij, Beogradi do të shfrytëzojë “mini-Shengenin” për të shtrirë tentakulat në Ballkan. “Mini-Shengeni Ballkanik vjen qartazi si një ide dhe reagim i mbylljes kufijve të mëdhenj dhe hapjes që dyerve me komshinjtë! Copëzimi dhe parcelizimi i Ballkanit në 3 shtete duke lënë jashtë Kosovën, Malin e Zi dhe më gjerë realisht e bën të pazbatueshëm projektin e Mini-Shengenit. 6 vjet më parë qeveria Rama zbarkoi me autobus në Prizren, duke premtuar afrimin e dy shteteve dhe dy qeverive”, deklaroi ai. Më tej, ish-kreu i Aleancës Kuqezi, Kreshnik Spahiu deklaroi se “mini-Shengeni” do të shfrytëzohet nga Serbia për të ngjizur “Jugosllavinë e Re”. “Në këto kushte dhe klimë politike, ka mbërritur mes Tiranës projekti “Jugosllavia e Re”.
Rama nuk heziton dhe as nuk i dridhet qerpiku në projektin dhe idetë e hapjes Ballkanike. Në shesh kanë dalë 150 protestues, të cilët më së shumti janë studentë nga Kosova. Atje mungonte opozita shqiptare. Atje nuk ishte as Luli dhe as Monika. Ata kanë protestuar 300 herë për 30 shtëpi tek Astiri. Ata kanë protestuar kundër Amerikës dhe BE afro 6 muaj. Ata kanë bërë me dhjetra deklarata kundër ambasadorëve të huaj. Ata i kanë shkuar në 12 të natës ambasadorit të BE në shtëpi kur flinte gjumë. Ata kanë debatuar me Departamentin e Shtetit dhe e quajtëm ndihmës sekretarin Palmer këlysh dhe dhëndër i gruaje serbe”, u shpreh ai.
Ndërkohë, ish-kreu i Aleancës Kuqezi, Kreshnik Spahiu akuzoi kreun e PD, Lulzim Basha dhe kryetaren e LSI, Monika Kryemadhi se kanë braktisur kauzën e opozitës. Sipas tij, LSI dhe PD i janë nënshtruar kryeministrit Edi Rama. “Luli dhe Mona që u përplasën 1 vit rresht me Uashingtonin dhe Brukselin, sot nuk protestuan në shesh kundër Beogradit që përdhunoi 20.000 gra shqiptare dhe vrau me mijëra të pafajshëm. Ndoshta nuk e quajnë tradhtar Edi Ramën dhe padyshim kjo s’është kauza e tyre. Fundja në jetën e tyre nuk kanë kryer asnjë vepër patriotike as me tokat dhe as me kufijtë. Madje kur i është dhënë rasti i kanë shitur ato. Sigurisht Edi Rama, gjen dhe bën”, nënvizoi Spahiu.
