Këshilli Bashkiak i Tiranës ka miratuar dje buxhetin për vitin 2010, i cili do të ketë prioritet finalizimin e prishjes së Teatrit Kombëtar dhe ndërtimin e një të riu, si edhe finalizimin e projektit të Unazës së Re. Sakaq këshilli ka miratuar edhe një bonus qiraje për 300 familje të prekura nga tërmeti i 26 nëntorit.
Theksojmë se buxheti për vitin 2020 i Bashkisë së Tiranës është buxheti më i madh në historinë e buxheteve për bashkitë. Ky buxhet është rritur me 11% nga viti i kaluar. Në prioritet e Bashkisë së Tiranës për vitin 2020, janë edhe zgjerimi i lumit Lana si dhe zona ekonomike në Kashar. Kryebashkiaku Erion Veliaj theksoi në fjalën e tij, se Tirana po bëhet gati për të festuar 100-vjetorin si kryeqytet dhe askush s’mund të pengojë zhvillimin. “Jam i vendosur, unë besoj dhe ju që t’i shkojmë deri në fund çdo projekti që transformon Tiranën dhe e bën atë më të mirë për fëmijët tanë. Megjithatë, kemi parë shpeshherë që për çdo projekt madhor të Tiranës, si dikur, protestat te këndi i lodrave e lodrat te Liqeni apo sheshin Skënderbej, të ngrihen çeta me individë që duan të ndalojnë punët e qytetit. Tani është bërë si modë: Sa herë ka një punë të madhe në qytet, ngrihet një çetë respektive, e vogël që e kundërshton, në kurriz të shumicës së heshtur që do zhvillimin e Tiranës.
Janë të njëjtët që duan të pengojnë zhvillimin, hiqen si të dashuruar pas artit, njëherë si të dashuruar pas mjedisit. Janë të njëjtët njerëz dhe kur vjen fjala për punë, është e fundit që e duan, pasi janë të interesuar vetëm për pengim dhe bllokim. Sot dua ta bëj të qartë se çdokush që pengon zhvillimin do të ketë përfundimin e asaj që ndodhi para pak ditësh te Astiri. Tirana nuk ndalet! Qytetarët duan zhvillimin, duan rrugët, duan Piramidën, duan teatrin, duan Bulevardin e Ri dhe zhvillimin aty, duan transformim në çdo lagje e çdo cep të qytetit. Askush nuk do të guxojë që të ndalë orën e Tiranës”, deklaroi Veliaj.
Viti 2020 finalizon projektet e bashkisë
Mes të tjerash, Veliaj bëri të ditur se edhe në Tiranën urbane do të nisin disa projekte për disa lagje të reja, ku do të strehohen qindra familje, pallatet e të cilave janë shpallur të pabanueshme. Ai theksoi se zhvillimi do të jetë cilësor dhe dinjitoz. Veliaj deklaroi sakaq se puna ka nisur në lagjen Kombinat. “Me qeverinë po ecim shpejt edhe me disa projekte të tjera për rindërtimin në disa lagje të reja të Tiranës. Kemi filluar projektin për lagjen e re në Kombinat. Duam që zhvillimi cilësor, dinjitoz edhe estetik, të jetë etalon për lagjen e re. Për të gjitha këto arsye, urbanizimi që do të ndodhë në Kombinat do të jetë i paprecedentë. I tillë është ai te “5 Maji”, fundi i kësaj rruge, me lagjen e re që po projektojmë te Bregu i Lumit.
Shumica e qyteteve në Europë apo në botë, duke filluar nga Kajro apo Roma, janë zhvilluar buzë lumenjve. Lumenjtë kanë qenë jeta. Ndërkohë, Bregun e Lumit e kemi pasur një fjalë të keqe. Duam që lumin e Tiranës të mos e shohim si një vend të humbur, por ta transformojmë në një lagje, që mund të jetë një hapësirë ideale për lagjen e re te 5 Maji. Lagjja tjetër që po përgatitemi ka të bëjë me hapësirën tek Uzina e Autotraktorëve”, ka deklaruar Veliaj.
Buxheti më i lartë i Bashkisë së Tiranës
Ashtu sikurse e theksuam edhe më sipër, por siç e ka nënvizuar në fjalën e tij edhe kreu i Bashkisë së Tiranës, Erion Veliaj, buxheti i vitit 2020 është më i larti ndonjëherë. “Fakti që ky është viti i pestë rresht që vijmë përpara Këshillit me një buxhet me rritje, besoj se na jep të gjithëve të drejtën të ndihemi krenarë për punën që kemi bërë, por ç’është akoma më e rëndësishme, na jep arsye të ndihemi optimistë se viti që vjen do të jetë një tjetër vit i mbarë për Tiranën, me shumë punë, shumë projekte, që do të na çojnë një hap më pranë objektivit tonë për të ndërtuar Tiranën e gjeneratës tjetër”, ka deklaruar Veliaj. /Arbjona ÇIBUKU
