Nga Ylli Pata
Në këto ditë kur Irani është bërë lajm botëror, shumë qarqe politike kanë nisur publikojnë qëndrimet e përbetuara dhe po shfaqen si armiqtë më të betuar të regjimit të Teheranit.
Por gjërat nuk janë fiks ashtu siç duket, pasi kanë kaluar vite dhe nuk kanë qenë gjërat kaq të ndara si sot, dhe qarqe politike e mediatike në Shqipëri, jo vetëm që kanë turbulluar ujërat në lidhje me muxhahedinët e ardhur në Shqipëri, por ka pasur sulme të detajuara ndaj tyre nëpër media shqiptare, që kanë qëndrime të qarta politike anti-qeveritare.
Gjithçka ka nisur që në 2013, me të ashtuquajturën çështje të armëve kimike të Bashar Al Asadit, kur ndodhi edhe protesta e parë në historinë 30 vjeçare përpara Ambasadës së SHBA në Tiranë. Mjafton të kthesh pamjet e asaj proteste për të parë protagonistët politikë.
Ndërkaq, opozita iraniane, e cila ka një organizim spartan, kujdeset gjithmonë që të ketë një organizim bipartizan në aktivitetet e saj përsa i përket politikës shqiptare.
Ftojnë rregullisht si ish-kryeministrin Sali Berisha, ish-ministrin Fatmir Mediu, ish-kryeministrin Pandeli Majko apo ish-zv.ministren e Brendshme Elona Gjebrea.
Kanë thirrur edhe presidentin Ilir Meta në Manzë, i cili ka vizituar zyrtarisht kampusin e opozitës iraniane, dhe ka takuar edhe kreun e Këshillit Kombëtar të Rezidencës, gruan që sfidon prej vitesh regjimin e ajatollahve.
Por realisht situata nuk është kaq grurë edhe tek politika shqiptare, në lidhje me opozitën iraniane.
Mjafton të përmendet vetëm një fakt i prillit 2016, kur Edi Rama ishte në Uashington dhe hyri në zyrën Ovale të Barack Obamës, ku u fol për ardhjen e të gjithë muxhahedinëve apo anëtarët e lëvizjes MEK, nga Iraku në Shqipëri.
Në 2013, Berisha-kryeministër firmosi për ardhjen e vetëm rreth 200 prej tyre.
Pikërisht në atë kohë, Flamur Noka, deputet i PD-së dhe ish-ministër i Brendshëm i vendit, kur u pranuan muxhahedinët e pare, thërret në interpelancë Edi Ramën, ku pyetjet e tij, edhe pse normale për një opozitë, në këtë rast u dukën se prekën disa çështje që mund të ishin një informacion i klasifikuar.
Partia Demokratike i ka hapur dosjen e muxhahedinëve iranianë, duke nxjerrë në publik diçka që është mbajtur sekret nga të dy palët, pas vizitës së sekretarit të Shtetit të SHBA-së, John Kerry, i cili ishte në Tiranë me 14 shkurt 2016.
Ish-ministri i Brendshëm, Flamur Noka, në letrën drejtuar Ramës, kërkoi informacion se sa pjesëtarë të muxhahedinëve janë dërguar në Francë me “dokumente udhëtimi”, pra pasaporta shqiptare.
Gjatë vizitës së John Kerry-t në Tiranë, kryeministri Rama deklaroi se “nuk është folur fare për muxhahedinët”, duke marrë përsipër kështu një problem, pasi në fakt ishte biseduar, por jo për publikun.
Kjo u bë më shumë për sigurinë e muxhahedinëve, të cilët u sulmuan egërsisht nga trupat e Qassim Solemani në Irak.
Sekretary Kerry, gjatë vizitës në Tiranë u takua edhe me kreun e opozitës Lulzim Basha, ku ka folur për këtë çështje. Vetë Basha nuk e nxori publikisht, por kur u pyet, tha se opozita është dakord për mbështetjen humanitare të iranianëve, madje shtoi se kjo gjë ka nisur që prej qeverisë “Berisha”.
Pikërisht ditën që Rama ka nisur vizitën në SHBA, Flamur Noka ka depozituar shkresën, ku theksohet: “Nëse kanë aplikuar apo fituar statusin e refugjatit disa prej tyre, me çfarë dokumenti udhëtimi kanë shkuar në Francë, ku janë vendosur në kampin e ngritur atje?”.
Pikërisht kjo pikë rrezikoi të hapë telashe për muxhahedinët, pasi jo thjesht rrezikohej siguria e tyre, por siç ndodhi më vonë, ishte një rrugë nga ku Teherani do të sulmonte opozitarët e tij, madje nga Tirana në disa media që njihen me qëndrimin e tyre pro opozitës.
