Ardhja e ambasadores së Shteteve të Bashkuara të Amerikës në Tiranë, Yuri Kim, duket se ka sjellë frikë tek të gjithë të korruptuarit e klasës politike në vend. Në gjë të tillë pohoi ditën e djeshme avokati Spartak Ngjela, i cili deklaroi se ndër më të tremburit është Sali Berisha, duke shtuar se për këtë arsye ai ka shtuar së fundmi thirrjet për protesta të dhunshme dhe revolta.
Në një reagim për gazetën “SOT”, Ngjela deklaroi se zbatimi i ligjit të reformës në drejtësi do të zbatohet me përpikmëri dhe të gjitha pasuritë që janë vënë në rrugë jo të ligjshme do të sekuestrohen. Avokati shtoi në reagimin e tij për gazetën se që nga ardhja e ambasadores amerikane, në Shqipëri ka ndryshuar gjithçka në favor të reformës në drejtësi. Avokat Spartak Ngjela u shpreh se ish-kryeministri Berisha i ka të kota të gjitha tentativat që mund të përdorë, pasi politika amerikane nuk do ta lejojë t’i shpëtojë drejtësisë.
“Sali Berisha ka shtuar sulmet për protesta të dhunshme dhe revolta sepse i ka hyrë frikë nga ambasadorja e SHBA, por nuk ka çfarë bën. Prezenca e saj ka trembur të gjithë të korruptuarit. Asgjë nuk bëjnë dot më, as protesta asgjë. Çdo gjë bëhet me ligj. Të korruptuarit duhet ti nënshtrohen pyetjeve të hetuesisë dhe të marrin pafajësinë në gjyq. Shumica e të korruptuarve do tu merren pronat dhe paratë. Kjo është e ardhmja e reformës në drejtësi dhe e reformës antikorrupsion. Edhe një herë e përsëris që ka një javë që ka ndryshuar gjithçka në favor të reformës”, tha Ngjela.
Zhdukja e krimit dhe korrupsionit
Më tej në reagimin e tij për gazetën, avokati deklaroi se ardhja e ambasadores Yuri Kim ka ngjallur shumë shpresë te qytetarët shqiptarë, të cilët sipas tij nuk po zhgënjehen nga puna e saj. Ngjela tha se zhdukja e krimit të organizuar dhe korrupsionit në nivele të larta është prioriteti kyç i politikave të mëdha ndërkombëtare për vendin tonë. Sipas tij, arritja e qëllimeve të reformës në drejtësi do të rrisë më shumë prestigjin ndërkombëtar të Shqipërisë, si dhe do hapet një rrugë e re zhvillimi, jo vetëm për Shqipërinë, por edhe për Kosovën.
“Ardhja e saj ishte me shumë shpresë në Shqipëri. Sipas të dhënave të mia, në shumë qytetete të vendit ajo është pritur me duartrokitje. Kjo do të thotë se ka shpresë shumë të madhe te qytetarët dhe ajo nuk po i zhgënjen. Ka filluar me intensitet të madh punën e vet, i ka dhënë shpresë njerëzve për reformën në drejtësi dhe mendoj që kështu do të vazhdojë. Shqipëria dhe shqiptarët nëse nuk arrijnë ta bëjnë këtë reformë që drejtohet nga politikat e mëdha do kenë dëm shumë të madh historik. Parimi me sukses i kësaj reforme dhe zhdukja e krimit të organizuar dhe korrupsionit rrit prestigjin ndërkombëtar të Shqipërisë dhe jap një rrugë të re të zhvillimit ndërkombëtar, qoftë për Shqipërinë qoftë për Kosovën”, u shpreh avokat Spartak Ngjela në reagimin e tij për gazetën “SOT”.
Avokati shtoi më tej se gjëja më esenciale e fjalës që mbajti ambasadorja e SHBA para gazetarëve ishte përmendja me theks e 100 vjetorit të mbrojtjes së Shqipërisë nga presidenti Uillson në 1920, duke shtuar se janari i 1920 koinçidoi me ardhjes e saj këtu. Ngjela tha se Yuri Kim e përmendi që ka ardhur në 100 vjetorin që Uisllon shpëtoi Shqipërinë dhe sipas tij ajo nuk e përmendi kot, duke theksuar se kë ka trembur kjo më mirë është të rijë në shtëpi të presë fatin. Sipas tij, e gjithë klasa politike që ka futur duart në paratë e shtetit janë të tmerruar nga reforma në drejtësi. / NGA ELISJEDA KIKO
