Kuvendi do të miratojë sot ligjet për t’i hequr presidentit betimin e gjyqtarëve dhe prokurorëve. Kjo nuk është pritur mirë nga Partia Demokratike dhe Lëvizja Socialiste për Integrim. Të paktën kështu kanë bërë me dije nënkryetari i LSI-së, Petrit Vasili dhe sekretari për Çështjet Ligjore të PD, Çlirim Gjata.
Ky i fundit në një deklaratë të papritur për shtyp, në kuadër të miratimit të Kuvendit ndryshimet në ligjin për Gjykatën Kushtetuese, nuk ka kursyer sulmin kundër kryeministrit të vendit Edi Rama, që sipas të cilit po deformon reformën në drejtësi. “Edi Rama ka parashikuar të kryejë të enjten një goditje të rëndë ndaj reformës në drejtësi dhe Kushtetutës së vendit, me qëllim heqjen e çdo pengese ligjore për planet e tij për të kapur Gjykatën Kushtetuese. Kontrolli prej tij i gjykatës që do të gjykojë vlefshmërinë apo jo të votimeve moniste të 30 qershorit, e ka detyruar Edi Ramën të deformojë akoma më shumë reformën në drejtësi”, tha ai. Më tej, duke sjellë në vëmendje ndryshimin në Kushtetuese, Gjata i cilësoi zyrtarët e drejtësisë shërbëtorë të qeverisë.
“Pasi dështoi me skemën për të imponuar emërime të paligjshme në këtë gjykatë, Edi Rama po tenton të ndryshojë procedurën e betimit të anëtarëve të Gjykatës Kushtetuese. Shërbëtorët e tij në drejtësi nuk do të shkojnë më të bëjnë betimin para noterit, siç ndodhi pak javë më parë, por do ta bëjnë atë me postë, përmes një deklarate me shkrim”, tha Gjata. Ashtu si dhe në nisje të fjalës, edhe në vijim akuzat kundrejt kryeministrit nuk munguan. Sekretari i Çështjeve Ligjore të PD-së tha se Rama është fajtori për zvarritjen e funksionimit të Gjykatës Kushtetuese dhe jo vetëm. Gjata tha se miratimi i ndryshimeve në ligj të Kushtetueses, ka të bëjë me qëllimin e Ramës për të marrë në kontroll këtë institucion.
“Gjykata Kushtetuese akoma nuk është funksionale, sepse Edi Rama e ka zvarritur për të bërë këtë që ka planifikuar të enjten- të marrë kontrollin politik edhe të gjykatës më të lartë të vendit. Për Partinë Demokratike ky është një akt i dënueshëm, që shkon kundër aspiratës së shqiptarëve për një shtet ligjor, që funksionon me standardet më të mira europiane dhe për një drejtësi të barabartë për çdo qytetar”, shtoi ai.
Reagimi i Vasilit
Nuk mungoi as reagimi i nënkryetarit të LSI, Petrit Vasilit në lidhje me funksionimin e shtetit ligjor. Në një deklaratë për shtyp, Vasili tha se vendi ndodhet në krizë, duke akuzuar se qeveria po e shkatërron reformën në drejtësi. “Shqipëria ndodhet sot në një nga momentet më kritike të saj, në lidhje me funksionimin e shtetit ligjor, atij shteti që garanton ligje dhe Kushtetutë të barabartë për të gjithë. Rilindja ka ndërmarrë një grusht të vërtetë shteti kundër reformës në drejtësi. Ka ndërmarrë një grusht të vërtetë shteti, kundër shtetit ligjor. Ka ndërmarrë një grusht të vërtetë shteti ndaj çdo të drejte dhe çdo integriteti ligjor minimal të shtetit shqiptar.
Ajo po zhbën reformën në drejtësi dhe pikërisht me këtë mentalitet puçist, ka dërguar edhe dy ligje të tjera, nga 7 ligje të paketës së reformës në drejtësi, të miratuar me konsensus, të miratuar me mbështetjen e Komisionit të Venecias dhe me mbështetjen e partnerëve ndërkombëtarë, pas përgatitjes së këtyre ligjeve nga grupet e ekspertëve të pavarur”, tha ai, ndërsa shtoi se shteti po vepron sipas interesit. “Këto ligje po shkatërrohen, po shqepen, po qepen sipas kostumit dhe vetë interesit të vetëm të Rilindjes që është kapja e institucioneve të drejtësisë dhe në mënyrë të veçantë e mbi të gjitha, e kapjes së Gjykatës Kushtetuese”, tha Vasili.Sot/ORNELA ÇELPICA
