Presidentit Ilir Meta duket se nuk i ndahet shpirti nga grekët dhe Kryepeshkopi Anastas Janullatos. Pas dështimit të skenarëve rusë në vendin tonë, kreu i shteti ka kthyer sytë nga Athina. Ditën e djeshme presidenti Meta ka thurur elozhe për Kryepeshkopin Janullatos, ndërsa e ka përgëzuar këtë të fundit për çmimin “Klaus Hemmerle 2020” për kontributin për përqasjen dhe bashkë-ekzistencën paqësore.
Përmes në postimi në rrjetet sociale, Meta theksoi se kontributi ndërkombëtar i Kryepeshkopit ka ndihmuar në afirmimin e Shqipërisë si vend i lirë dhe me harmoni ndërfetare. “E përshëndes vlerësimin e merituar të Kryepeshkopit të Tiranës, Durrësit dhe gjithë Shqipërisë, Anastas Janullatos, me çmimin ndërkombëtar “Klaus Hemmerle 2020”, për kontributin e Tij të shquar për përqasjen dhe bashkë-ekzistencën paqësore. Krenar për rolin e çmuar të Fortlumturisë së Tij dhe Kishës Ortodokse Autoqefale të Shqipërisë në veçanti, për forcimin e harmonisë ndërfetare, kësaj vlere kombëtare dhe modeli unik në mbarë botën.
Kontributi ndërkombëtar i Kryepeshkopit Janullatos ka ndihmuar në afirmimin e shkëlqyer ndërkombëtar të Shqipërisë, si vend i lirisë dhe harmonisë ndërfetare. I gëzuar që ky lajm i mirë vjen pak ditë pasi në emër të Shqipërisë i konfirmova Sekretarit amerikan të Shtetit, Michael Pompeo se jemi të përkushtuar në mbështetjen dhe fuqizimin e Aleancës Ndërkombëtare për Mbrojtjen dhe Avancimin e Lirive Fetare”, shkruan Meta. Ndërkohë, brenda këtij muaji, Meta ka folur dy herë me superlativa për Kryepeshkopin Janullatos, pasi në datën 1 shkurt të këtij viti kreu i shtetit është parë në ambientet e Katedrales Ortodokse, ku ka kaluar disa orë me zotin Janullatos.
Takimi ka ardhur në kuadër të nismës për dhurimin e gjakut, por presidenti nuk e ka fshehur afeksionin që ka për peshkopin grek Janullatos, duke e vlerësuar këtë të fundit për rolin e tij sa i takon shpopullimit të popullsisë. “Anastas Janullatos predikon se: “E kundërta e paqes nuk është lufta, por egocentrizmi”. Mirënjohje dhe falenderim të veçantë për Kishën Ortodokse Autoqefale për kontributet dhe përkushtimin e veçantë për dekurajimin e fenomenit të shpopullimit të vendit, duke theksuar rëndësinë e rritjes së shpresës dhe promovimit të vlerave tona më të mira kombëtare, te fëmijët dhe të rinjtë tanë”, ka deklaruar asokohe Meta në rrjetet sociale.
