Nga Anri Bala
Ndërsa bota është në ankth për të gjetur një vaksinë apo çfarëdo ilaçi tjetër për të luftuar apo zbutur Covid-19, shqiptarët e “zgjuar”, analistë kanalistë, qesharak, humoristë dhe askush-ist,nga budallallëku dhe marrëzia e smirës së idiotit, janë në ankth dhe dilemë, se a po vepron mirë qeveria që nuk dëgjon… këshillat e tyre.
Të këshillosh si gjeneral kur nuk je as ushtarë, por thjesht një “bartës drush” në dasëm, vërtet është sfidë e madhe ndaj guximit duke e fyer… guximtarin. “Mentarët” që mbushin studiot e boshatisura të mediave, si tradhëtarë të dashur të kësaj lufte, na kërkojnë të kundërshtojmë, të rezitojmë, bile pse jo, të luftojmë për lirinë tonë… të lëvizjes së kufizur me dhunë.
Mirëpo, e keqja e këtyre të mençurve të çmendur është, se ngatërrojnë armikun tonë me armikun e tyre. Armiku ynë, që duhet ti ruhemi, nuk ngjan fare me armikun e tyre që nuk kemi pse t’i ruhemi, sepse është zgjedhur aty me dashje apo pa dashje, si kryeministër i Republikës Parlamentare Shqiptare.
Pra lufta e tyre për ta ndryshuar armikun, është një betejë e paprecedentë, duke përdorur nje fatkeqësi si armë… bumerang. Nëse nuk ndjehen të rrezikuar për jetën e tyre mes parave të hajdutërisë, mashtrimit, lehjes dhe bythëlëpirjes së përhershme, “filozofët e mërzisë dhe inatit”, ta ruajnë filozofinë e tyre pas luftës kur jeta të kthehet ne normalitet… për ne.
Ata mes bollikut dhe horrllikut, ndoshta mendojnë se do i’a hedhin paq duke vazhduar luftën me armikun e tyre Edin, të ndihmuar nga kjo e keqe që na gjeti, e janë gati të thërrasin: Mirëseerdhe o koronavirus, pa kuptuar se shqiptarët nuk janë Edi Rama, por një racë që u “bëjnë nënat”… në paqe.
Tani vetëm një pyetje më lind vetvetiu: Më mirë një Shqipëri kineze, për të fituar këtë luftë me pak dhimbje, apo një Shqipëri angleze, që e ka lëshuar C-19 të livadhis dhe ajo ka marrë revansh dhe shumë shpejt do i’a dëgjojmë këngën, ashtu sikurse deklaroi vetë Boris Johnson. Kina e mposhti dhe e fitoi këtë luftë, duke njoftuar se më 25 mars fillon mësimi në të gjitha shkollat e vendit, madje në Wuhan, vetëm një i prekur në dy ditë.
Ndërsa qeveritë në kontinentin e vjetër po marrin masa gjithnjë e më drastike, si ato të qeverisë shqiptare, Londra duket se me fjalët e Johnson po “lan duart” përballë emergjencës së infeksionit nga koronavirusi dhe do ketë fatin e Italisë, e cila u zgjua kur armiku ishte tek dera me ushtrinë e tij.
Ndaj edhe njëherë, në emër të jetës duhet të ruhemi, sepse nuk mund të mburremi si të marrët me hijen tonë duke u gremisur në fatin tonë. Mos ta kthejmë vendin në republikën e mediokritetit, ku gjeniu është i rrezikshëm.
Shumica e shqetësimeve mes nesh shkaktohet nga njerëz pa vlerë, që duan të jenë të rëndësishëm, kur janë… asgjë.
Ndaj do t’ia dalim, nëse besojmë se njeriu fiton gjithmonë, ama… njeriu!/Ekskluzive.al
