Ilir Meta duket se nuk do ta pranojë që me reformën në drejtësi presidenti nuk ka asnjë rol në sistemin e drejtësisë. Jo pa qëllim u shkri KLD dhe u krijua Këshilli i Lartë Gjyqësor, pasi e vetmja gjë që ndryshoi, ishte largimi i presidentit nga qeveria e sistemit gjyqësor. Por edhe pse Kushtetuta dhe ligji shprehen se gjyqësori është i pavarur, presidenti Meta vijon të cenojë pavarësinë e drejtësisë.
Kërkesa për shkarkimin e Ardian Dvoranit dhe ultimatumi për të marrë masa për zbatimin e ndryshimeve në Kodin Penal, nuk kanë qenë i vetmi rast i kohëve të fundit. Meta më datë 4 maj i ka dërguar një tjetër letër KLGJ, duke shtuar presionet ndaj saj sa i takon plotësimit të vakancave në Gjykatën e Lartë. KLGJ shtyu shkarkimin e Dvoranit dhe Meta nuk e ka kapërdirë këtë gjë duke këmbëngulur te ideja e tij se vakanca e fundit i përket Xhezair Zaganjorit dhe jo Dvoranit. Në letër Meta ka kërkuar sqarime se si po procedohet me plotësimin e fundit të vendit vakant në Gjykatën e Lartë nga radhët e juristëve. “Në kushtet kur plotësimi i Gjykatës së Lartë shihet si një çështje tepër e rëndësishme për sistemin e drejtësisë, Presidenti i Republikës, në mbështetje të nenit 92/h të Kushtetutës, kërkon një informacion dhe të dhëna me shkrim mbi fazën në të cilën ndodhet dhe kur pritet të përmbyllet procedura e shpallur nga ana juaj për aplikim me Vendimin nr. 172, datë 11.09.2019, vendim ky i marrë pas shkarkimit nga detyra të gjyqtarit të fundit të Gjykatës së Lartë nga radhët e juristëve të spikatur, z. Xhezair Zaganjori. Mbetemi në pritje të këtij informacioni brenda një kohe sa më të shpejtë”, thuhet në shkresë.
Shkelja e pavarësisë
Meta në shkresën e tij përmend nenin 92/h të Kushtetutës. Por çfarë thotë ky nen? “Presidenti ushtron edhe këto kompetenca: h) kërkon mendim dhe të dhëna me shkrim nga drejtuesit einstitucioneve shtetërore për çështje që kanë të bëjnë me detyrat e tyre”, thuhet në këtë nen. Pra presidenti vërtet ka të drejtë të kërkojë informacion, por në asnjë moment nuk mund të kërkojë llogari.
Meta i kërkon llogari KLGJ-së se përse po vonohet plotësimi i vakancës dhe po ashtu ushtron presion se kjo vakancë i takon Zaganjorit. Ajo që e vërteton këtë është se KLGJ gjatë diskutimeve për Zaganjorin e bëri të qartë se te Gjykata e Lartë nuk veprohet si me Kushtetuesen, pra nuk ka zëvendësime emrash, por thjesht plotësim të vendeve bosh. Me pak fjalë 3 emrat e emëruar deri tani nuk është se kanë zëvendësuar një gjyqtar specifik që është larguar nga detyra. Por shkresa e presidentit duket se ka fiks këtë qëllim, për të nxitur KLGJ se vakanca e fundit i takon Zaganjorit. Pra edhe pse presidentit i lind e drejta të informohet, duket se kemi shkelje të pavarësisë. Meta nuk ka aspak rol në procesin e emërimeve në Gjykatën e Lartë. Ai thjesht ushtron rolin e noterit për emrat e përzgjedhur nga KLGJ. Pra KLGJ pasi shpall garën, bën verifikimet dhe në fund del me emrat konkretë e ja çon presidentit për dekretim. Nëse ky i fundit nuk i dekreton, KLGJ ka të drejtë të rrëzojë dekretin. Pra presidenti ka të njëjtin rol si me ligjet e qeverisë, që thjesht i dekreton, por nëse i kthen, Kuvendi rrëzon dekretet. Ndërkohë duhet theksuar se ambasadorja e SHBA pak ditë më parë e bëri të qartë se duhet të kemi një drejtësi të pavarur. Por edhe pse ka ndaluar sulmet publikisht, duket se presidenti po punon në prapavijë për të pasur dhe ai pjesën e tij në drejtësi.
