Rreth 512 milionë lekë është fondi i caktuar nga qeveria për procesin e rindërtimit. Që në hartimin e planit për ringritjen e shtëpive të dëmtuara nga tërmeti, ministri i Rindërtimit, Arben Ahmetaj lajmëroi se nëse do duan një pjesë e qytetarëve mund t’i ndërrojnë vetë shtëpitë sigurisht me garantim financiar nga qeveria.
Ndërkohë ditën e djeshme Ahmetaj në një deklaratë për mediat tregoi se ditën e djeshme qeveria ka marrë 4 vendime kryesore lidhur me procesin e rindërtimit. Një nga vendimet ka përcaktuar vlerën prej 512 milionë lekësh që do të kalojë nga e premtja direkt në llogaritë e qytetarëve që do duan të ndërtojnë vetë shtëpinë e tyre. Sipas të dhënave të ministrisë, bëhet fjalë për mbi 1174 banesa dhe 27 pallate në Bashkinë Shijak, ku dëmtimet ishin më të mëdha.
“Sot kaluam 4 vendime të rëndësishme për rindërtimin. Sot fillojmë zyrtarisht programin e granteve për Bashkinë Shijak, që janë pagesa direkte për familjet, banesat e të cilave pësuan dëmtime që nuk e çojnë në domosdoshmëri shembjen e banesës apo pallatit. Punimet mund t’i bëjnë vetë apo me bashkitë dhe qeveria i subvencionon në bazë të aktit normativ. Qeveria miratoi fondin 512,967,289 lekë, i cili i shtohet Bashkisë Shijak në buxhetin e miratuar për 2020 si transfertë e pakushtëzuar. Që do të thotë se që nga e premtja në mëngjes bashkia të firmosë pagesa direkte për 1174 banesat individuale dhe 27 pallatet.
Masën e grantit familjet do e përfitojnë në llogaritë e tyre”, deklaroi ai. Më tej Ahmetaj tregoi se, në proces e sipër të projektit qeveria do të lëvrojë një tjetër fond me vlerë 70 milionë dollarë, pasi në vijim pritet të përfundojë planet e rindërtimit edhe qytetet e tjera të prekura nga tërmeti i 26 nëntorit. “Gjithashtu në ditët në vijim presim listën nga Bashkia e Kurbinit. Bashkitë e tjera të përshpejtojnë procesin e vlerësimit. 70 mln dollarë do të jepen në vazhdimësi për të gjitha bashkitë. Të gjitha familjet e dëmtuara në Shkurt patën mundësi të aplikojnë në platformën “Shtëpia ime”.
Bashkitë kanë vijuar me një proces vlerësimi të detajuar për çdo aplikim dhe zgjedhjen e përfituesve, me listat që miratohen në këshillat bashkiakë, sikur ndodhi me Shijakun. Bashkia Shijak është e para që e finalizoi këtë proces. Në ditët që vijnë presim Tiranën, Durrësin, Kurbinin dhe të tjerat të përfundojnë procesin dhe të kalojnë listat në këshilla”, sqaroi Ahmetaj.
Gati plani për rindërtimin e shkollave
Ndër të tjera ministri i Rindërtimit tregoi se qeveria ka gati edhe planin për ndërtim e të gjithë shkollave të dëmtuara përpara se të fillojë viti i ri shkollor. Në këtë pikë Ahmetaj theksoi se gjendja e vështirë ekonomike që ka përfshirë vendin tonë nuk do të privojë planet e qeverisë për rindërtim. Sakaq ai doli garant se procesi i rindërtimit do të sjellë zhvillim në sektorin e ndërtimit dhe do të mundësojë hapjen e kantiereve të reja në këtë sektor.
“Edhe pse në kohë pandemie, që ka shkaktuar ndërprerje të punës normale dhe vonesa të një sërë procesesh në çdo vend të botës, ne kemi avancuar thuajse me ritme normale për procesin e rindërtimit, për rikthimin e qytetarëve në shtëpitë e reja, që padyshim do të jenë më të sigurta se ato që u dëmtuan. Gjithashtu do iu mundësojmë fëmijëve të nisin vitin e ri shkollor në shkolla dhe kopshte të rindërtuara, si dhe për të hapur kantiere rindërtimi, për të krijuar një dimension të ri të zhvillimit”, tha Ahmetaj. Gjithashtu ai tha se është gati projekti turk për ndërtimin e 500 banesave, çka do të merret si një shembull tipik për zhvillimin urban.
“Në ditët në vijim do të firmoset me ministrin turk, Murat Kurum. Projekti është prezantuar publikisht. I kemi kaluar të gjitha fazat, nga projekti i detajuar, deri te shpronësimet për banorët që preken. Atje do të ndërtohen 500 banesa, model i ri i zhvillimit urban”, tha ai.
