Kryeministri Edi Rama duket se synon edhe dy mandate të tjera në krye të qeverisë. Pak ditë më parë i pari i qeverisë njoftoi për një paketë financiare deri në vitin 2029, por dje ai e ka bërë të qartë se ky plan është për qeverinë e tij dhe jo për qeveritë e tjera që do të vijnë pas.
Gjatë një konference me gazetarët, shefi i qeverisë u duk i bindur se do të fitojë me patjetër zgjedhjet e ardhshme, ndërsa theksoi faktin se përmes paketës financiare synon që t’i vijë në ndihmë bizneseve për aq kohë që Partia Socialiste, sipas tij, do të qeverisë deri në vitin 2029. “E vërtetë është që paguajnë taksa se më pak, por nuk shoh si një pasojë të çlirimit të biznesit të vogël, që të ikë biznesi i madh fare nga Shqipëria, se nuk do t’i lërë biznesi i vogël të bëjnë evazion.
Kjo do të bëhet, shqiptarët që merren me punë krijuese, që nuk rrinë në Facebook gjithë ditën dhe kërkojnë në komente gjëra nga më të çuditshmet, apo ata që nuk ankohen dhe qahen gjithë ditën, meritojnë respektin e qeverisë. Ata shqiptarë që janë në majë të malit apo në fund të hartës buzë detit, dhe që kanë një biznes të vogël familjar, do të jenë drita e syve të qeverisë tonë deri në vitin 2029”, deklaroi ai.
PD do i kontestojë sërish zgjedhjet
Duke komentuar marrëveshjen politike të 5 qershorit mes mazhorancës dhe opozitës sa i takon reformës zgjedhore, kryeministri Edi Rama theksoi se nuk i ka marrë asnjë lloj kënaqësie, përveç faktit se miku i tij kryedemokrati Lulzim Basha është qetësuar dhe çliruar nga frika e zgjedhjeve. Në këtë kontekst, Rama shprehu bindjen se pavarësisht dakordësisë së arritur, Partia Demokratike do t’i kontestojë sërish zgjedhjet.
“Sigurisht që e vetmja kënaqësi që kam marrë unë nga marrëveshja është kënaqësia e Lulit, rëndësi ka që u kënaq Luli dhe më shumë se kaq nuk ka asnjë kënaqësi tjetër për të marrë nga ajo marrëveshje sepse nuk reformon asgjë në sistem për sa i përket administrimit.
Por qëllimi i marrëveshjes ishte pikërisht ky, nuk ishte pamundësia jonë për të shkuar përpara vetëm, por ishte që të bashkoheshim të gjithë ne bashkë me gjithë botën për ta lehtësuar Lulzim Bashën dhe të tjerët pas tij nga frika e tmerrshme e zgjedhjeve dhe për t’i thënë si e do ti, thuaj si e do që të mos kemi më llafe. Unë e di që do të kemi prapë llafe, se prapë do të fitojmë dhe ata prapë do të humbasin. Por sidoqoftë ne e bëmë këtë në funksion të një mesazhi paqeje dhe mesazhi ndërveprimi”, u shpreh ai.
Nuk ka “blerje” votash për kalimin e Kodit
Kryeministri Edi Rama thekoi më tej gjatë fjalës së tij se do të synohet të gjendet një mirëkuptim sa më i gjerë për të siguruar votat që reforma zgjedhore të kalojë në Parlament, ndërsa pranoi se PS nuk i ka 84 kartonë dhe se nuk do të ketë blerje votash nga opozita parlamentare sikundër aludohet. Madje, zoti Rama kujtoi se deputetët e opozitës në Kuvend janë produkt i Bashës dhe Kryemadhit, duke shtuar se me lista të hapura mund t’i kemi sërish në Kuvend. “Aman kur flisni për deputetët që janë në Parlament mos harroni që janë të Bashës e Kryemadhit.
Kush i sheh si persona që janë shfaqur aty e harron historinë e shkurtër se janë aty të zgjedhur nga Lulzim Basha e Monika Kryemadhi. Kur flasim për listat e hapura se janë elementë çudibërës për të rritur lirinë e demokracinë, por mos harroni se ça janë aty sot janë pjesë e listës. Gjuzi apo Ngjala, ky apo ajo. Ne jemi këtu që ta çojmë përpara këtë proces, ta mbyllim në mënyrë të ndershme, dinjitoze jo duke u futur në historia kap njërin e kap tjetrin, nuk shkon që në rrugë të bësh konsensus dhe në Parlament të shkosh me shpatë.
Votat nuk i kemi, por do t’i bëjmë, nuk do luftojmë në sensin aritmetik, por duke u marrë me të tjerët sa do ja dalim këtë nuk e dimë. Mos e paçi fatin të jeni në vendin tim në këtë situatë”, nënvizoi kryeministri Edi Rama./NGA RIGELS SELIMAN
