Aleatët e Bashës janë rreshtuar kundër ndryshimeve në Kushtetutë. Pak ditë më parë teksa ishte duke folur në foltoren e Kuvendit, kryeministri Edi Rama dha dakordësinë për të përkrahur propozimin e 28 deputetëve të opozitës parlamentare për të hapur listat dhe rrjedhimisht ndalimin e koalicioneve.
Kjo kërkesë pritet që sot të marrë dritën jeshile në mbledhjen e përbashkët të Këshillit të Legjislacionit dhe Komisionit të Ligjeve, por ka rindezur edhe debatin politik për reformën zgjedhore mes mazhorancës dhe opozitës joparlamnetare.
Gjatë një prononcimi për gazetën “SOT”, kreu i Partisë Agrare Ambientaliste, Agron Duka theksoi se është kundër ndryshimeve kushtetuese për disa arsye, ndërsa akuzoi kryeministrin Edi Rama se me shkeljen e syrit që i ka bërë opozitës së re, ka si synim sipas tij, shkatërrimin e paktit të 5 qershorit të arritur në rezidencën e ambasadores amerikane në Tiranë mes PS, PD dhe LSI për reformën zgjedhore.
“Si fillim duhet të kuptojmë pse Ramës 5 qershori i rri ngushtë. Arsyeja është shumë e thjeshtë, me atë marrëveshje Rama u detyrua të pranojë se kauza e opozitës për zgjedhje të lira dhe ndëshkim të krimit zgjedhor, ishte e drejtë. Fakti që mazhoranca u detyrua, nën trysninë ndërkombëtare të pranojë kushtet e opozitës, do të thotë se edhe nga ndërkombëtarët ai shihet si shkelësi i zgjedhjeve. Prandaj ai po përpiqet të bëjë çmos që ta shkatërrojë 5 qershorin dhe lëvizjet më të fundit përfaqësojnë një hedhje poshtë të marrëveshjes së arritur me mirëbesimin e partnerëve tanë.
Nëse do të ishim në një situatë normale, debatet mbi pragun, sistemin, koalicionet, do të ishin të mirëpritura nga ana ime dhe e kolegëve të mi të partive të vogla, megjithatë forma që mori debate, pra si një përpjekje për të ndryshuar rregullat e lojës në mënyrë të njëanshme, për të anestitizuar frikën nga humbja, është e turpshme”, deklaroi ai.
PS po tenton të shkaktojë konflikt
Më tej në prononcimin e tij për gazetën “SOT”, kreu i Partisë Agrare Ambientaliste, Agron Duka theksoi se kryeministri Edi Rama dhe Partia Socialiste po tentojnë të shkaktojnë konflikt, për shkak se sipas tij, e kanë pranuar propozimin e opozitës së re me vetëdije dhe duke përjashtuar konsensusin. Sipas tij, nuk mund të bëhen ndryshime kushtetuese një vit para zgjedhjeve dhe mbi të gjitha të njëanshme.
“Debatet për ndryshime kushtetuese nuk mund të ndodhin në këtë mënyrë pasi jemi më afër se një vit përpara zgjedhjeve dhe mbi të gjitha pa konsensus. Është në tërësinë e vet një manovër për të menaxhuar humbjen e Ramës, si dhe njëkohësisht një përpjekje për të shkaktuar një konflikt nga i cili ai do të përfitojë në kurriz të shqiptarëve dhe integrimit të vendit”, nënvizoi Duka.
Por më i ashpër në prononcimin e tij ishte kreu i PDK-së, Nard Ndoka. Ky i fundit gjatë një prononcimi për mediat e cilësoi dje nismën e kryeministrit Edi Rama për heqjen e koalicioneve si një aventurë të rrezikshme, që sipas tij, fut vendin në një përplasje të pashmangshme civile e politike. “Së pari, është propozim absurd, se me ligjin aktual, pragu është shumë herë më i lartë, në qarkun e Kuksit arrin deri në 25%.
Pragu ka vlerë, kur flasim për një sistem proporcional kombëtar. Deputetët e mbetur në Kuvend, thjesht janë ushtarë të bindur të Ramës. Heqja e koalicioneve, tregon që Rama është nën trysninë e humbjes së thellë dhe se ata deputetë që e kërkojnë janë nën efektin e pushtetit miklues e korruptiv të Ramës.
Kjo është një aventurë e rrezikshme, që jo vetëm minon marrëveshjen dhe pengon integrimin, por fut vendin në një përplasje të pashmangshme civile e politike”, deklaroi Ndoka.
