Lufta e gjatë e ndërkombëtarët duket se po i kthehet në bumerang presidentit. Ilir Meta prej gati një viti ka lëshuar akuza nga më të rëndat për ambasadorët. Nga mafiozë e karagjozë, në trafikantë droge. Madje arriti deri aty sa lidhi ambasadën amerikane me kokainën e Xibrakës.
Por të gjitha këto duket se po i kthen mbrapsht, pasi ambasadorët e kanë lënë në baltë në luftën që ka nisur me qeverinë. Meta ditët fundit po sillet si kryetar partie dhe aspak si president. Madje përtypi akuzat dhe mblodhi në një takim të gjithë ambasadorët duke kërkuar ndihmën e tyre në luftën me qeverinë, si për ndryshimet kushtetuese ashtu dhe për reformën në drejtësi. Por sinjalet janë të qarta se ambasadorët po e fundosin presidentin.
Së pari askush prej tyre nuk reagoi për këtë takim. Së dyti gazeta ka mësuar se ata vetëm kanë dëgjuar argumentet e presidentit dhe nuk kanë folur aspak. Dhe ajo që i vë kapak është ambasadorja franceze. Përmes një deklarate ajo ka treguar hapur se ndërkombëtarët janë mërzitur me të tilla sjellje si ajo e presidentit. Në një deklaratë për mediat Christine Vasac, e bëri të qartë se kjo është çështje brendshme dhe ambasadorët nuk ndërhyjnë. “Mos prisni një përgjigje prej meje mbi themelin e organizimit, sepse kjo është çështje shqiptare. Ka një projekt të rieditimit të të gjithë Kushtetutës shqiptare.
Kryeministri është shprehur në mënyrë publike dhe në Parlament në lidhje me këtë. Ka edhe një qëndrim të presidentit të vendit, i cili na mblodhi ne të gjithë ambasadorëve të BE dhe të Mbretërisë së Bashkuar dje. Ju përket shqiptarëve dhe vetëm atyre që ta trajtojnë këtë çështje. Ka një kalendar i cili është vendosur dhe nëse do të respektohet ose jo kalendari këtë do ta tregojë koha. Por do të duhet një bashkëpunim i pozitës dhe opozitës në mënyrë që ne të marrim një rezultat”, tha ajo.
Qëndrimet e ambasadorëve
Deri më sot asnjë ambasador nuk i ka dalë në mbështetje presidentit. Ambasadorja franceze ja bëri fare të qartë, ndërsa shuplaka që ka ardhur nga ambasadorja amerikane ka qenë disa herë më e fortë. Meta ka sulmuar vazhdimisht reformën në drejtësi dhe ambasadorja ka dhënë një sërë mesazhesh. Më i forti ishte ai 2 marsit, kur Meta mori në dorë flamurin amerikan. Në të njëjtën linjë me të ka qenë ambasadori i BE. Një rast të fundit kemi emërimin rekrut të KLSH të propozuar nga Meta. Nuk pati asnjë reagim ndërkombëtar për ta përshëndetur. Ndërkohë kemi një braktisje totale të LSI dhe veçanërisht të Kryemadhit nga ndërkombëtarët. Ambasadorët negociojnë vetëm me Ramën dhe me Bashën.
Heqja e koalicioneve
Por gjithë kjo luftë e Metës me ndërkombëtarët duket se do të sjellë kapitullimin e partisë së tij. Meta po lufton fort që të ndalë heqjen e koalicioneve, por tashmë sinjalet janë dhënë se PS-PD po shkojnë drejt konsensusit dhe kanë pas vetes ndërkombëtarët. Ambasadorët e kanë bërë të qartë se do të mbështesin çdo lloj pakti të dalë nga Këshilli Politik. Por nga ana tjetër duket qartë se nuk ka një reagim kritik të fortë ndaj mazhorancës. Të gjithë kanë kërkuar konsensus, deklarata shabllone që janë bërë të përditshme tani.
Asnjë ambasador nuk ka dalë dhe të kundërshtojë ndryshimet kushtetuese apo të sulmojë qeverinë. Të gjithë i mëshojnë konsensusit, por jo se nëse kjo nuk ndodh qeveria do e ketë pisk punë. Pra duket se presidenti është i vetëm përballë Ramës, Bashës dhe ambasadorëve. Koalicionet më 30 korrik hiqen dhe të gjithë e dinë se kjo skemë i intereson si PS ashtu dhe PD. Ajo që e dëshmon është se Basha e ka bërë të qartë se do hyjë në zgjedhje me çdo lloj sistemi dhe nuk ka asnjë sinjal për aksion opozitar. Ajo që humb është padyshim LSI. Me heqjen e koalicioneve kjo parti rrezikon të rrudhet në një numër minimal deputetësh në Parlament.
Viti 2017 është shembulli kryesor. Sipas burimeve e gjithë kjo lojë e opozitës është për shkak të presioneve të saj, pasi për PD nuk përben problem skema e propozuar nga PS. Pra ndryshimet kushtetuese rrezikojnë shkrirjen e LSI dhe bashkë me të fundin e Metës. Nëse kjo parti mbetet jashtë pushtetit, Meta në 2022 mbyll mandatin dhe del “elektron i lirë”, pasi nuk mund të jetë as deputet dhe nuk merr dot mandat të dytë. Pra do jetë pa imunitet dhe në 2022 BKH me SPAK do jenë në kulmin e tyre. Si duket presidenti po korr atë që mbolli./Sot/ Kliti Topalli
