Ka përfunduar takimi i kësaj paraditeje mes ambasadores së SHBA-së, Yuri Kim, ambasadorit të BE-së, Luigi Soreca dhe kryeministrit Edi Rama, zhvilluar në zyrën e këtij të fundit.
Ende nuk dihen detaje rreth këtij takimi, që u zhvillua paralelisht me seancën plenare, ku mazhoranca po prezanton raportin final të Komisionit Hetimor për shkarkimin e Presidentit Ilir Meta.
Duhet thënë gjithashtu se mbledhja e tyre në një tryezë vjen në një kohë të tensionuar politike, sa u takon ndryshimeve kushtetuese dhe hapjes së listave. PD dhe LSI janë gati të pranojnë listat e hapura, madje në masën 100%, por nuk pranojnë që të hiqen koalicionet parazgjedhore, një ndryshim që pritet të ndodhë në datën 30 korrik, kur mazhoranca dhe opozita parlamentare do ta votojnë në Kuvend.
