Nga Mero Baze
Deputeti gjerman Krischbaum është sulmuar nga Partia Socialiste dhe shtypi afër Edi Ramës, si një politikan që po përpiqet të frenojë ratifikimin e rekomandimit për hapjen e negociatave mes Shqipërisë dhe Bashkimit Europian. Duket që është tepërim i qëllimshëm. Është fushatë kundër tij. Dhe duket që është bërë me shumë vetëdije.
Në njërën anë është kryeministri i Shqipërisë me të vetët që kërkojnë ratifikimin e rekomandimit, dhe nga ana tjetër ky deputeti që është mik i Lulzim Bashës, dhe në emër të Lulzim Bashës po përpiqet të bëhet pengesë.
Beteja edhe pse mund të ketë ekzagjerime, është normale, pasi njëra palë lufton për të mirën e Shqipërisë, tjetra kundër Shqipërisë.
Edi Rama ka mobilizuar shtypin ta akuzojë ndoshta në mënyrë të ekzagjeruar se ai ka dhe lidhje ruse apo vese njerëzore, Krischbaum ka angazhuar Doris Pack ta akuzojë si mashtrues Edi Ramën.
Dhe këtë po e quaj normale.
Ajo që është anormale, është përse Partia Demokratike duhet të angazhohet në një fushatë pse po shahet zëdhënësi i fushatës kundër hapjes së negociatave me Shqipërinë.
PD e ka atë një aleat politik, siç ka shumë të tjerë, por që janë pro Shqipërisë në këtë rast. I vetmi kundër është ky, dhe PD mbron vetëm këtë, duke dedektuar në fakt të vërtetën, se ajo qëndron pas deklaratave të tij.
E them këtë, pasi nuk është në traditën e PD të mbrojë të huajt që merren me Shqipërinë. Arsenali i njohur politik i PD është sulmi kundër tyre. PD po shan prej vitesh me libër shtëpie çdo ambasador amerikan në Shqipëri nga viti 1995 e deri më sot. Po shan me libër shtëpie çdo të dërguar ndërkombëtar, çdo ambasador të BE, çdo euro-parlamentar që mbështet Shqipërinë, për të mos thënë pastaj që vetë Berisha është angazhuar kundër Fleckenstein, që mbulon integrimin e Shqipërisë në BE, me shpresë se do ta egërsojë dhe atë si antishqiptar.
Pra, në traditën e PD është sulmi kundër të huajve, dhe jo mbrojtja e tyre. Dhe një herë që duan të mbrojnë dikë, po mbrojnë dikë që kuptohet se thotë thjesht ato që i çojnë këta. Tani duhet ta ndajnë këtë punë. Ose Krischbaum paguan taksën e mendimeve të veta kundër Shqipërisë dhe qeveria është në të drejtën e saj t’i përgjigjet, ose paguan taksën e Lulzim Bashës dhe Lulzim Basha po do, të paguajë dhe këtë taks. Por të paktën ta ndajnë përse nuk duhet sulmuar dikush që sulmon Shqipërinë. Nuk duhet sulmuar se është mik i Lulzim Bashës, apo se nuk duhet mbrojtur Shqipëria?
