Lëvizja e lirë drejt vende europiane vijon të mbetet e kufizuar, por shtete të ndryshme po nxjerrin rregulla të reja lidhur me hyrjen e shteteve të huaj në territorin e tyre.
Sa i përket lëvizjeve drejt Italisë, kompanitë ajrore njoftojnë se mund të udhëtojnë shtetasit italianë, ata me leje qëndrimi, shtetasit europiane, si dhe ata që janë të pajisur me viza mjekësore si dhe janë tranzit në Itali, por me kushtin që të kenë prerë biletën deri në destinacionin final. Italia vijon të mbajë të mbyllur kufirin për udhëtimet për turizëm deri në një vendim të dytë. Ndërkohë, ata që shkojnë në Itali, duhet të kryejnë edhe karantinën 14- ditore në banesë. Por e njëjta gjë po ndodh edhe me shtetin grek.
Rikthehet makthi i pritjeve të emigrantëve shqiptarë për të kaluar drejt Greqisë. Nga mbrëmja e së dielës në pikën e kalimit kufitar të Kapshticës kanë filluar të krijohen radhë, pasi autoritet kufitare greke, nuk lejojnë kalimin e më shumë se 300 personave në ditë, kusht ky i vendosur për shkak të pandemisë së COVID-19.
Situata e radhëve në pritje ka vijuar edhe gjatë ditës së dielë, ku Policia Kufitare shqiptare njoftoi që në orën 8 të mëngjesit që ishte plotësuar kuota prej 300 personash dhe se nuk do të lejohej më askush të kalonte nga Kapshtica. Kjo ka bërë që policia shqiptare të bllokojë automjetet pa arritur në pikën kufitare duke mos i lejuar të vazhdojnë më tej. Ndërkohë emigrantët shqiptarë shprehen të shqetësuar pasi përveç datave për rifillimin e punës, u skadojnë edhe aplikimet që bëjnë për të kaluar si dhe përgjigja e testeve që kanë bërë për COVID-19. Aplikime këto që një personi i kushtojnë plot 130 euro.
Pavarësisht tentativës për të arritur një marrëveshje me autoritetet kufitare greke, situata ka vijuar e njëjta gjatë ditës të së dielës dhe personat në radhë presin me shpresën se po të arrijnë të kalojnë në orët e mëngjesit, nëse nuk u skadojnë aplikimet dhe përgjigjet e testeve të COVID-it. “Për 14 ditë të tjera dhe deri më 15/9/2020, kontrolli i marrjes së mostrave të atyre që hyjnë nga jashtë shtrihet, si dhe kufizimet në hyrjen e shtetasve të vendeve të treta;
Për më tepër, shtrihet kufizimi i lidhjeve detare dhe ajrore me Shqipërinë dhe Maqedoninë Veriore. Kujtohet se fluturimet dhe nga këto vende bëhen vetëm nga aeroporti “Eleftherios Venizelos”; Për më tepër, vlefshmëria e kushteve për hyrje nga lidhjet tokësore shtrihet, si dhe detyrimi për të kufizuar përkohësisht hyrjen në shtëpi të personave që hyjnë nga Kakavija dhe Krystalopigi; Masat speciale për hyrjen në territorin e banorëve të përhershëm të Izraelit gjithashtu do të vazhdojnë të zbatohen”, thuhet në njoftimin e qeverisë greke.
