Lëvizja Socialiste për Integrim u është rikthyer dje thirrjeve për rrëzimin e qeverisë. Edhe pse na ndajnë disa muaj në mbajtja e zgjedhjeve të ardhshme parlamentare, LSI duket se është trembur nga këto zgjedhje, ndërsa ka kërkuar trazira në vjeshtë për rrëzimin e qeverisë, ka qenë nënkryetari i kësaj partie, Petrit Vasili, i cili gjatë një deklarate për mediat teksa ka akuzuar qeverinë për gjendjen ekonomike që ndodhet Shqipëria, është shprehur se zgjidhja e vetme është përmbysja e kryeministrit Edi Rama.
“Lajmet më të fundit dhe informacionet më të fundit tregojnë qartë një situatë tronditëse në ekonomi, e cila në mënyrë të veçantë është e tillë tronditëse për ata që janë më të varfrit dhe për ata që janë më të pambrojturit në Shqipëri. Praktikisht shifrat zyrtare flasin për 32.4 mijë biznese të mbyllura deri në muajin korrik. Pra 32 400 biznese. 98% e bizneseve, pra thuajse shumica absolute e të cilave janë biznese të vogla e ku për pasojë rreth 60 mijë shqiptarë kanë humbur punën.
Përballë kësaj situate nuk ka asnjë alternativë dhe asnjë zgjidhje tjetër për këdo qytetar përveç se përmbysjes së këtij regjimi pasi iluzioni se këta do të ndihmojnë dikë apo do t’i heqin hallin dikujt apo do t’ia lehtësojnë hallin se për të hequr nuk e heqin dot kurrë, është thjesht dhe vetëm një iluzion”, deklaroi ai.
Pra, kjo deklaratë tregon qartë se LSI është partia më e trembur nga zgjedhjet dhe se zgjidhje shikon trazirat dhe kaosin. Madje, një nga arsyet se përse partia e Monika Kryemadhit është në alarm, është edhe fakti se heqja e koalicioneve parazgjedhore dhe sinjalet që Partia Demokratike do të dalë me listë të saj në zgjedhjet e ardhshme parlamentare, duke i mbyllur kështu derën Lëvizjes Socialiste për Integrim. Kështu që nisur nga këto, LSI kërkon trazira në vjeshtë për rrëzimin e qeverisë.
LSI shton presionet ndaj PD
Por teksa ka vijuar më tej me akuzat në adresë të kryeministrit Edi Rama dhe ka bërë thirrje për rrëzimin e qeverisë së drejtuar prej tij, nënkryetari i Lëvizjes Socialiste për Integrim një mesazh të koduar i ka dërguar edhe Partisë Demokratike. Vasili është shprehur se nuk ka kohë më dhe se ka ardhur momenti për të rrëzuar qeverinë, duke treguar qartë se që të ndodhë kjo gjë duhet edhe ndihma e PD.
Sipas tij, qeveria është përgjegjëse për rritjen e papunësisë dhe varfërisë, kështu që duhet rrëzuar. “Papunësia troket në derën e gjithsecilit dhe është një e papritur që mund të lindë nga sot në nesër.
Përmbysja është e vetmja mundësi, e vetmja alternativë së cilës asnjë qytetar nuk i shmanget dot në qoftë se do të bëjë diçka për veten, për familjen, për fëmijët që presin të ardhurat e domosdoshme për një jetesë minimale, të cilat kjo qeveri nuk mund dhe nuk ia siguron dot kurrë, për shkak se orientimi i saj është vetëm te grabitja korruptive, pastrimi i parave, ekonomia informale që vret dhe shkatërron të gjitha bizneset e vogla dhe të mesme.
Koha është sot për ta bërë këtë ndryshim të madh! Koha nuk pret në mënyrë që të shpëtojmë familjen shqiptare nga rrënimi ekonomik, por akoma më rëndë nga rrënimi shoqëror, dramatik, i cili është ulur këmbëkryq dhe po i troket te dera edhe atyre që nuk janë përballur me të”, nënvizoi nënkryetari i Lëvizjes Socialiste për Integrim, Petrit Vasili./NGA RIGELS SELIMAN
